ఇంటి దొంగను ఈశ్వరుడైనా పట్టలేరంటారు. సిబ్బంది సహకరిస్తే ఈ దేశంలో రైల్వేదొంగతనమంత ఈజీదొంగతనం ఇంకోటి ఏముంటుంది. రాత్రికి రాత్రే రెండు కిలోమీటర్ల రైల్వే లైన్ దర్జాగా దోచేసారు దొంగలు. ఈ ఘటన బిహార్ లోని సమస్తిపుర్ రైల్వే డివిజన్ పరిధిలో జరిగింది. నిరుపయోగంగా పడిఉన్న 2 కిలోమీటర్ల రైలు పట్టాలను అధికారుల సహకారంతో అపహరించారు దొంగలు.
గతంలో మధుబని లోహత్ షుగర్ మిల్ నుంచి పండోల్ స్టేషన్ వరకు రైల్వే లైన్ వేశారు. అయితే ఏళ్ల తరబడి ఈ చక్కెర మిల్లు మూతపడి ఉండటం వల్ల ఈ మార్గం వినియోగంలో లేదు.
దీంతో దొరికిందే ఛాన్సు అనుకుని ఈ పట్టాలను దోచుకుపోయారు దొంగలు. జనవరి 24న జరిగిన ఈ ఘటనకు రైల్వే అధికారులు సహకరించి ఉంటారని పోలీసులు భావిస్తున్నారు. దీనిపై డిపార్ట్మెంట్లో అంతర్గత విచారణ జరుపుతున్నామని పోలీస్ శాఖ తెలిపింది.
ఈ కేసుపై ఎఫ్ఐఆర్ నమోదు చేసుకున్న దర్భంగా ఆర్పీఎఫ్ పోలీసులు దర్యాప్తు ప్రారంభించారు. ఈ చోరీకి బాధ్యుల్ని చేస్తూ డివిజన్ సెక్యూరిటీ కమిషనర్‌తో పాటు ఇద్దరు ఉద్యోగులను రైల్వే శాఖ సస్పెండ్ చేసింది.
కాగా గతంలో పుర్నియా కోర్టు స్టేషన్ పరిధిలో ఇలాగే.. ఓ రైల్వే ఇంజన్ చోరీకి గురైంది. గతేడాది నవంబరులో బెగుసరాయ్ జిల్లా బరౌనీ ప్రాంతంలోనూ ఇదే తరహా ఘటన జరిగింది. గర్హరా రైల్వేయార్డ్లో మరమ్మతులకోసం తీసుకువచ్చిన ఓ ట్రైన్ ఇంజిన్ను.. దొంగలు మాయం చేశారు.
దొంగలు ఈ ఇంజిన్ను వారం రోజుల్లో ముక్కలు ముక్కలుగా చేసి ఎత్తుకుపోతూ.. చివరకు ఇంజిన్నే లేకుండా చేశారు. ఈ చోరీ కోసం ఆ దొంగల ముఠా ప్రత్యేక సొరంగ మార్గాన్ని కూడా ఏర్పాటు చేసుకున్నారు.
గత సంవత్సరం ఏప్రిల్లో ఏకంగా బ్రిడ్జినే అపహరించారు బిహార్ దొంగలు. ఎవరికీ అనుమానం రాకుండా మూడురోజుల్లో ఈ పనిని కానిచ్చేశారు. వాడుకలో లేని ఈ వంతెనలో భారీగా ఇనుము ఉండటం చూసి దొంగలు పక్కాగా ప్లాన్ చేసారు.
ఇరిగేషన్ శాఖ అధికారులమని చెప్పి గ్యాస్ కట్టర్లు, జేసీబీని ఉపయోగించి ఇనుమునంతా కట్ చేశారు. ఎంచక్కా దాన్ని డీసీఎంలో లోడ్ చేసి దర్జాగా తీసుకెళ్లారు.