తొందరపాటులో కొన్ని సరదా అయిన సంఘటనలు జరుగుతుంటాయి.ఆ క్రమంలోనే కొన్ని విషాదకర సంఘటనలూ చోటుచేసుకుంటాయి. ఒక్కోసారి జరిగిన పొరపాటుకు భారీ మూల్యం చెల్లించుకోవాల్సి వస్తుంది.అలాంటి సంఘటనే సూర్యాపేట జిల్లాలో జరిగింది.
ఓ పెళ్లి వేడుకలో విషాదం చోటుచేసుకుంది. కారు డ్రైవర్ నిర్లక్ష్యం కారణంగా ఓ చిన్నారి ప్రాణాలు కోల్పోయింది. బొజ్జగూడెం గ్రామంలో పెళ్లి జరుగుతుండగా పెళ్లి వేడుకల్లో జరుగుతున్న బరాత్ ను చూసేందుకు బాణోతు ఇంద్రజ(9) అనే చిన్నారి కారు కిటీకిలో నుంచి తల బయటకు పెట్టింది.
అయితే డ్రైవర్ శేఖర్‌ దీనిని గమనించకుండా కారు విండో గ్లాస్ ను పైకి ఎత్తాడు. దీంతో అందులో చిన్నారి మెడ ఇరుక్కుంది.దీంతో పాపం ఆ చిన్నారికి ఊపిరాడక అక్కడికక్కడే చనిపోయింది.బాలిక మృతితో పెళ్లి ఇంట్లో విషాదం నిండుకుంది.
విషయం తెలుసుకున్న ఆ చిట్టితల్లి కుటుంబ సభ్యులు, బంధువులు కన్నీరుమున్నీరుగా రోదిస్తున్నారు.పాప తండ్రి బాణోతు వెంకటేశ్వర్లు ఫిర్యాదు మేరకు డ్రైవరు శేఖర్‌పై కేసు నమోదు చేసుకొని దర్యాప్తు చేస్తున్నామని పోలీసులు తెలిపారు.