సోషల్ మీడియా ద్వారా యువతులు, మహిళలే లక్ష్యంగా మోసాలకు పాల్పడుతున్న వంశీకృష్ణ బాగోతాలు మరిన్ని వెలుగులోకి వస్తున్నాయి. ఇప్పటివరకు అతడు 60 మందిని మోసం చేసి రూ.6 కోట్ల వరకు దోచుకున్నట్లు వెలుగులోకి రాగా.. పోలీసుల విచారణలో దిమ్మతిరిగే నిజాలు బయటపడ్డారు. వంశీకృష్ణ సుమారు 1000 – 1500 మందిని యువతులు, మహిళలను మోసగించి రూ.40-50 కోట్ల వరకు దోచుకున్నట్లు పోలీసులు అంచనా వేస్తున్నారు. అతడిపై అనేక ఫిర్యాదులు రావడంతో గత మే నెలలో సైబర్‌ క్రైమ్‌ పోలీసులకు పట్టుకున్నారు. తాజాగా హైదరాబాద్‌ సైబర్‌క్రైమ్‌ పోలీసులు అతడిని అరెస్ట్‌ చేశారు.
తూర్పు గోదావరి జిల్లా రాజమహేంద్రవరంలోని రామచంద్రరావుపేటకు చెందిన జోగాడ వంశీ కృష్ణ బీటెక్‌ చేశాడు. ఉద్యోగం వెతుక్కుంటూ 2014లో హైదరాబాద్‌ వచ్చిన అతడు కూకట్‌పల్లిలోని ఓ హోటల్‌లో కొంతకాలం పనిచేశాడు. అతడికి హర్ష, హర్షవర్ధన్‌, చెరుకూరి హర్ష అనే మారుపేర్లు కూడా ఉన్నాయి. 2015లో క్రికెట్‌ పందేలకు అలవాటుపడ్డ వంశీకృష్ణ.. 2016లో జాబ్‌ కన్సల్టెన్సీ ఆఫీసులో చేరాడు. ఉద్యోగాలిప్పిస్తానంటూ 10 మంది యువకులకు మోసగించిన కేసులో అరెస్టయి జైలుకెళ్లాడు. బయటికి వచ్చాక మాధురి చౌకి, గాయత్రి, శ్వేత, స్వాతిక – జెస్సీ, హర్ష కూల్‌ 94 పేర్లతో ఇన్‌స్టాగ్రామ్‌లో ఫేక్ అకౌంట్లు క్రియేట్ చేశాడు.
మహిళలు, యువతులకు తనను తాను యువతిగా పరిచయం చేసుకునేవాడు. తాను సంపాదించిన ఆదాయంలో సగానికి పైగా సేవా కార్యక్రమాలకు వెచ్చిస్తున్నట్లు బిల్డప్ ఇస్తూ వారిని బుట్టలో వేసుకునేవాడు. ఉద్యోగం, ఉపాధి, సేవా కార్యక్రమాలను వారి నుంచి పెద్దమొత్తంలో డబ్బులు గుంజేవాడు. పరిచయమైన మహిళలు ఆర్ధిక ఇబ్బందుల్లో ఉన్నట్టు తెలిస్తే వెంటనే వారి అకౌంట్లలో లక్షల రూపాయలు వేసేవాడు. అలా డబ్బులు తీసుకున్న వారు అతడి గురించి మంచిగా ప్రచారం చేసేవారు.
ఇలా ఆరేళ్ల వ్యవధిలో వంశీకృష్ణ 1000-1500 మంది మహిళలను మోసం చేశాడని విచారణ అధికారులు చెబుతున్నారు. వంశీకృష్ణపై పలు సెక్షన్ల కింద కేసు నమోదు చేసిన పోలీసులు అతడి బ్యాంక్ అకౌంట్లో ఉన్న రూ.4కోట్ల నగదును ఫ్రీజ్ చేశారు. రిమాండ్‌లో ఉన్న అతడిని కస్టడీలోకి తీసుకుని విచారిస్తే మరింత సమాచారం బయటపడుతుందని యోచిస్తున్నారు.