జన్యూన్ రీజన్ తో అప్పుచేసేవాళ్ళు చాలా తక్కువ మంది ఉంటారు.మిగిలిన వాళ్ళంతా అడిగినప్పుడు చూద్దాంలే అన్న ధీమాతోనే అప్పు చేసే వాళ్ళే.! అడిగినప్పుడు మహానటుణ్ణి బైటకు తీసి..డ్రామాలు స్టార్ట్ చేస్తారు. అలాంటి ఓ డ్రామాకి శుభం కార్డు వేసారు పోలీసులు.
వివరాల్లోకి వెళ్తే…లక్ష రూపాయలను ఎగ్గొట్టేందుకు పెదనాన్నకే కుచ్చుటోపీ పెడదామనుకున్నాడు.. తమ్ముడి కొడుకు. పాతబస్తీ ఉప్పుగూడ సాయిబాబానగర్‌లో నివాసం ఉంటున్న రమేష్ (40) వృత్తి రీత్యా లేబర్. అదే కాలనీకి చెందిన వృత్తి రీత్యా లేబర్ అయిన అతని పెదనాన్న వద్ద మూడేళ్ల క్రితం లక్ష రూపాయలను అప్పుగా తీసుకున్నాడు.
అయితే ఆ డబ్బులు తిరిగివ్వాలని రమేష్ పెదనాన్న ఒత్తిడి చేయసాగాడు. దీంతో పెదనాన్న కుటుంబంపై కక్ష పెంచుకున్నాడు రమేష్. ఈ నేపథ్యంలోనే ఎలాగైనా పెదనాన్నను, అతని కొడుకుని పోలీసు కేసులో ఇరికిస్తే లక్షరూపాయలు ఎగొట్టవచ్చని పథకాన్ని రచించాడు.
ఈ నేపథ్యంలో ఫిబ్రవరి 28వ తేదీన సాయంత్రం సమయంలో రమేష్ ఆటోలో దేవతల గుట్ట సమీపంలోని ఆర్సీఐ మెయిన్ రోడ్ వద్ద దిగాడు. అక్కడ కాస్త దూరం నడుచుకుంటూ వెళ్ళి ముందుగా వేసుకున్న పథకం ప్రకారం వైర్లతో ముందుగా కాళ్ళను గట్టిగా కట్టేసుకున్నాడు.
అనంతరం చేతులు వెనక్కు పెట్టుకుని ఒక చేతికి వైర్‌ను గట్టిగా, మరో చేతికి కాస్త లూజుగా కట్టుకున్నాడు. నోట్లో పెట్టీపెట్టనట్టు గుడ్డను పెట్టుకుని కింద పడి పెనుగులాడడం, గట్టిగా మూలగడం ప్రారంభించాడు. అటుగా వచ్చిన అయోధ్యనగర్‌కు చెందిన కళ్యాణ్ బాలాపూర్ పోలీసుల దృష్టికి తీసుకువెళ్లాడు.
వెంటనే పోలీసులు అక్కడికి చేరుకుని అతని కాళ్లకు, చేతులకు ఉన్న వైర్లను తొలగించారు. తనను పెదనాన్న కుమారుడు సురేష్ పని ఇప్పిస్తానని ఇక్కడికి తీసుకువచ్చి వైర్లతో కాళ్లు, చేతులు కట్టేసి చితకబాదాడని, హత్య చేయబోయాడని రమేష్ బాలాపూర్ పోలీసులకు ఫిర్యాదు చేశాడు.
ఆ దిశగా కేసు దర్యాప్తు చేసిన బాలాపూర్ పోలీసులకు రమేష్ ఫిర్యాదులో పేర్కొన్న ప్రకారం సీసీ కెమెరాలను పరిశీలించారు. ఆటోలో రమేష్ ఒక్కడే దిగినట్లు పోలీసులు గుర్తించారు. పెదనాన్న కుమారుడు సురేష్ కాల్‌డేటా ఆధారంగా లొకేషన్ చెక్ చేయగా గుంటూరులో ఉన్నట్లు నిర్దారించారు.
మరోసారి అతడిని విచారించగా గుంటూరులోనే ఉన్నట్లు సురేష్ చెప్పడంతో పోలీసులు తమదైన శైలిలో రమేష్‌ను విచారించారు. పెదనాన్నకు లక్షరూపాయలు ఎగ్గొట్టడానికే ఈ కిడ్నాప్ డ్రామా ఆడినట్లు పోలీసుల విచారణలో నేరాన్ని అంగీకరించాడు.
గతంలో కూడా రమేష్ ఓ కిడ్నాప్ డ్రామా ఆడినట్లు పోలీసులు గుర్తించారు. పోలీసులను తప్పుదోవ పట్టించిన రమేష్‌ను అరెస్ట్ చేసి కఠిన చర్యలు తీసుకుంటామని పోలీసులు వెల్లడించారు.