కేరళలో శ్రద్దావాకర్ తరహా హత్య… వ్యాపారిని ముక్కలుగా నరికి..!

కేరళలో దారుణం చోటు చేసుకుంది. కోజికోడ్ జిల్లాలో హోటల్ యజమానిని ఇద్దరు స్నేహితులు అత్యంత కిరాతకంగా హత్య చేశారు. శ్రద్దా వాకర్ హత్య కేసు తరహాలో ఆ వ్యాపారి మృత దేహాన్ని ముక్కలు ముక్కలుగా నరికారు. అనంతరం ట్రాలీ బ్యాగులో తీసుకు వెళ్లి అటవీ ప్రాంతలో విసిరేశారు.

ఈ కేసులో ఇద్దరు నిందితులను పోలీసులు అదుపులోకి తీసుకుని విచారించారు. పోలీసుల విచారణలో సంచలన విషయాలు వెల్లడయ్యాయి. పోలీసుల వివరాల ప్రకారం… మలప్పురం జిల్లా తిరూర్‌కు చెందిన సిద్ధిఖ్​ (58) హోటల్ వ్యాపారం నిర్వహిస్తున్నాడు. ఆయనకు కోజికోడ్​లోని ఒలవన్నాలో ఓ హోటల్​ వుంది.

దీంతో హోటల్ వ్యాపారం చూసుకుంటూ కుటుంబ సభ్యులకు దూరంగా ఒలవన్నాలోనే ఉంటున్నాడు. ఈ నెల 18న కోజికోడ్​లోని ఎరంజిపాలెంలోని ఓ హోటల్​లో రెండు గదులు బుక్ చేశాడు. అదే హోటల్​లోనే పాలక్కడ్​కు చెందిన నిందితులు శిబిల్ ​(22), అతడి స్నేహితురాలు ఫర్హానా (18) కూడా రూం తీసుకున్నారు.

ఈ క్రమంలో సిద్ధిఖ్​కు అతని కుమారుడు ఫోన్ చేశాడు. ఎన్ని సార్లు ఫోన్​ చేసినా​ సిద్దిఖీ ఫోన్ స్విచ్ ఆఫ్​ వచ్చింది. అదే సమయంలో ఏటీఎం నుంచి భారీగా డబ్బులు డ్రా చేసినట్టుగా అతని ఫోన్ కు మెసేజ్ లు వచ్చాయి. దీంతో ఏం జరుగుతుందో అర్థం కాక పోలీసులకు ఫిర్యాదు చేశారు.

పోలీసులు సీసీ టీవీ పుటేజ్ పరిశీలించారు. నిందితులతో పాటు సిద్ధిఖ్​ కుడా హోటల్​లోకి వెళ్తన్నట్టు సీసీటీవీలో రికార్డ్​ అయింది. మే 19న శిబిల్​, ఫర్హానా ఓ ట్రాలీ బ్యాగ్​తో కిందకు వస్తున్నట్టు కనిపించింది. ఈ క్ర మంలో పోలీసులు వారిని అదుపులోకి తీసుకుని విచారించారు.

సిద్ధిఖ్​​ నిర్వహిస్తున్న హోటల్​లో శిబిల్​ 15 రోజులు పనిచేశాడు. శిబిల్ ప్రవర్తన నచ్చక అతన్ని పనిలో నుంచి సిద్దిఖీ తొలిగించాడు. ఈ క్రమంలోనే సిద్దిఖీని శిబిల్, అతని స్నేహితురాలు కలిసి హత్య చేసినట్టు పోలీసులు గుర్తించారు.
పనిలో నుంచి తొలగించినందుకు పగ పెంచుకుని హత్య చేశాడా లేదా వేరే ఇతర కారణాలేమైనా ఉన్నాయా అనే కోణంలో పోలీసులు దర్యాప్తు చేస్తున్నారు. సిద్ధిఖ్​ను నిందితులు ఆరు రోజుల ముందే హత్య చేసి ఉంటారని పోలీసులు అంచనా వేస్తున్నారు.

ఎరంజిపాలెంలో సిద్దిఖీ ఎందుకు గది తీసుకున్నారు? అని పోలీసులు దర్యాప్తు చేస్తున్నారు. సిద్దిఖీ రెండు గదులు తీసుకోవడం కూడా అనుమానం కలిగిస్తోంది. ఘటన వెనుక హనీ ట్రాప్​ ఏమైనా ఉందా..? అనే కోణంలో దర్యాప్తు చేస్తున్నారు. సిద్దిఖీ అకౌంట్ నుంచి లక్షల రూపాయలు విత్ ​డ్రా అయినట్టు తెలుస్తోంది. అవి సిద్దిఖీ డ్రా చేశాడా లేదా వేరే ఎవరైనా డ్రా చేశారా అని పోలీసులు ఆరా తీస్తున్నారు.