ఒక్కొక్కరికి ఒక్కోపిచ్చి ఉంటోంది. ఫేమ‌స్ కావ‌డం కోసం తిక్క ప‌నులు చేస్తుంటారు. అలాగే ఫేమ‌స్ కావాల‌నుకున్నాడో ఏమో తెలియ‌దు కానీ.. ఓ వ్యక్తి వింత ప‌ని చేశాడు. సోషల్ మీడియాలో వైరల్ కావ‌డం కోసం ఆడ మేకను పెళ్లి చేసుకున్నాడు. ఈ వింత ఘ‌ట‌న ఇండోనేషియాలో చోటుచేసుకుంది.
సైఫుల్ ఆరిఫ్ (44) అనే వ్యక్తి జూన్ 5న గ్రెసిక్ లోని బెంజెంగ్ జిల్లాలోని క్లాంపోక్ గ్రామంలో శ్రీ రహయు బిన్ బెజో అనే మేకను వివాహం చేసుకున్నాడు. వివాహ వేడుకకు సంబంధించిన వీడియో సోషల్ మీడియాలో వైరల్ గా మారింది. ఈ వీడియోలో ఆరిఫ్ జావానీస్ దుస్తులు ధరించి కనిపించగా.. మేకను శాలువాతో అలంకరించారు. సంప్రదాయ జావానీస్ దుస్తులు ధరించిన స్థానికుల బృందం పెళ్లి వేడుకకు హాజరయ్యారు. అంతేకాదు వరుడు ఆడ మేకకు 22 వేల రూపాయలను కట్నంగా కూడా ఇవ్వ‌డం గ‌మ‌నార్హం.
అయితే.. సైఫుల్ ఆరిఫ్ అనుకున్నట్టుగానే వీడియో వైరల్ అయింది. కానీ.. ఈ వీడియోపై నెటిజన్లు మండిప‌డుతున్నారు. ఇదొక అసహ్యకరమైన కంటెంట్ అని, ఇలాంటి వాటివల్ల డబ్బు వస్తుంది కానీ.. ప్రజలకు సమస్యలు వస్తాయని ఓ నెటిజన్ అభిప్రాయపడ్డారు. అలాగే “పెళ్లి చేసుకునే వారిని మాత్రమే నిందించకూడదు.. ఇలాంటి పెళ్లికి మద్దతు ఇస్తున్న గ్రామ పెద్ద, చుట్టుపక్కల ప్రజలు వెర్రివాళ్లని నేను అనుకుంటున్నాను. వారు దానిని ప్రోత్సహించారు.” అని కామెంట్ పెట్టారు.
దీంతో సైఫుల్ అంద‌రికీ క్ష‌మాప‌ణ చెప్పాడు. ఈ వీడియో కేవలం వినోదం కోసం మాత్రమేనని.. ఎవరినీ ఇబ్బంది పెట్టాల‌నే ఉద్దేశ్యంతో చేయ‌లేద‌ని పేర్కొన్నాడు. ఇది పూర్తిగా నటన అని, దానిని వైరల్ చేయాలనే ఉద్దేశ్యంతో సోషల్ మీడియా కంటెంట్ కోసం రూపొందించామని చెప్పారు. కేవలం ప్రేక్షకులను అలరించడం కోసమే రూపొందించామని ఆయన తెలిపారు.
