ఆధార్ కార్డు.. ప్రతి భారతీయ పౌరుడికి ఒక ముఖ్యమైన డాక్యుమెంట్. మనకు ప్రతి విషయంలోనూ ఆధార్ కార్డు తప్పనిసరి. అందుకే ఇందులో చిన్న తప్పు ఉన్నా కూడా ఇబ్బందులు పడుతుంటారు. ఈ నేపథ్యంలో ఆధార్ కార్డులో ఫోటో అసలు గుర్తు పట్టలేనంతగా ఉండటం, కొన్ని సందర్భాల్లో మరొకరి ఫోటో వచ్చిన సందర్భాలు, పేర్లు తప్పుగా ఉన్న సందర్భాలు ఎన్నో చూశాం. అయితే, తాజాగా ఓ ఘటనలో ఆధార్ కార్డులో పేరు తప్పుగా ఉన్న కారణంగా స్కూల్లో అడ్మిషన్ ఇవ్వలేదు ఉపాధ్యాయులు. ఈ ఘటన ఉత్తరప్రదేశ్ రాష్ట్రంలో చోటుచేసుకుంది.
బదాయూ జిల్లా రాయ్‌పుర్ గ్రామానికి చెందిన దినేశ్ అనే వ్యక్తి తన కూతురు ఆర్తిని తీసుకుని అడ్మిషన్ ఇవ్వాలని ప్రాథమిక పాఠశాలకు శనివారం వెళ్లాడు. టీచర్ ఎక్తా వర్షిణి అడ్మిషన్ ఇచ్చేందుకు నిరాకరించారు. దీంతో ఎందుకు అడ్మిషన్ ఇవ్వటం లేదని ప్రశ్నించారు.
దీంతో వారు సమాధానమిస్తూ.. ఆధార్ కార్డులో బాలిక పేరు స్థానంలో ‘మధు కా పాంచ్ వా బచ్చా’ అని హిందీలో ‘ బేబీ ఫైవ్ ఆఫ్ మధు’ అని ఆంగ్లంలో రాసి ఉంది. కాని ఆర్తి అని ఎక్కడా లేదు. ఈ కారణంగానే తిరస్కరించినట్లు తెలిపారు. ఆధార్ కార్డును సరిచేసుకుని తీసుకురావాలని దినేశ్కు సూచించారు.
ఈ అంశంపై స్పందించిన జిల్లా మెజిస్ట్రేట్ దీపా రంజన్..’ఆధార్ కార్డులను పోస్టాఫీసులు, బ్యాంకుల్లో సిద్ధం చేస్తారు. సిబ్బంది నిర్లక్ష్యం వల్ల తప్పులు దొర్లుతాయి. కార్డు తయారైన బ్యాంకు, పోస్టాఫీసు అధికారులను అప్రమత్తం చేసి నిర్లక్ష్యానికి కారకులైన వారిపై కఠిన చర్యలు తీసుకునేలా చూస్తాం’ అని పేర్కొన్నారు.
అయితే, ప్రస్తుతం వింత పేరుతో ఉన్న బాలిక ఆధార్ కార్డు ప్రస్తుతం సోషల్ మీడియాల్లో వైరల్గా మారింది. ఆ కార్డుపై ఆధార్ నంబర్ సైతం లేకపోవటం గమనార్హం. అధికారుల తీరుపై నెటిజన్లు విమర్శలు గుప్పిస్తున్నారు.