అద్భుతమైన నటనతో, విభిన్నమైన సినిమాలతో తనకంటూ ప్రత్యేక స్థానాన్ని సంపాదించుకుంది హీరోయిన్ ఐశ్వర్య రాజేష్. విలక్షణమైన పాత్రలతో ఆకట్టుకుంటున్న ఐశ్వర్య రాజేష్, తాజాగా ‘డ్రైవర్ జమున’ పేరుతో మరో డిఫరెంట్ మూవీ చేస్తోంది. ఔట్ అండ్ ఔట్ రోడ్ మూవీ గా తెరకెక్కుతున్న ఈ చిత్రానికి కిన్స్ లిన్ దర్శకత్వం వహిస్తుండగా 18 రీల్స్ పై ఎస్.పి.చౌదరి నిర్మిస్తున్నారు.
తాజాగా “డ్రైవర్ జమున” ఫస్ట్ లుక్ పోస్టర్ ను విడుదల చేశారు. స్టార్ ప్రొడ్యూసర్ దిల్ రాజు ఈ పోస్టర్ లాంఛ్ చేశారు. ఈ ఫస్ట్ లుక్ పోస్టర్ లో ముఖం మీద చెమటలు, రక్తం మరకలతో ఎగ్రెసివ్ గా కనిపిస్తోంది ఐశ్వర్య రాజేష్.
లేడీ క్యాబ్ డ్రైవర్ జీవితంలో చోటు చేసుకున్న నాటకీయ సంఘటనల నేపధ్యంలో ‘డ్రైవర్ జమున’ చిత్రాన్ని థ్రిల్లింగ్ గా రూపొందిస్తున్నారు. ఐశ్వర్య రాజేష్ ఈ పాత్ర కోసం చాలా మంది లేడీ క్యాబ్ డ్రైవర్లని కలసి వారి బాడీ లాంగ్వేజ్ తగ్గట్టు నేచురల్ గా నటించింది.
సాధారణంగా రోడ్ మూవీస్ ని బ్లూ మ్యాట్ టెక్నాలజీ ఉపయోగించి చిత్రీకరిస్తారు. అయితే ఐశ్వర్య రాజేష్ ప్రతి ఒక్క షాట్ లో ఎటువంటి డూప్ లేకుండా నటించింది. తన పాత్ర వాస్తవానికి దగ్గరగా ఉండేందుకు, స్వయంగా రోడ్లపై కారు నడిపింది ఐశ్వర్య రాజేష్. జిబ్రాన్ సంగీతం అందిస్తున్న ఈ సినిమా షూటింగ్ చివరి దశలో ఉంది. తెలుగు, తమిళం, కన్నడ, మలయాళం భాషల్లో ఏకకాలంలో విడుదల చేయడానికి సన్నాహాలు చేస్తున్నారు.
