అల్లు అర్జున్, సుకుమార్ కలయికలో వచ్చిన ‘పుష్ప: ద రైజ్’ సినిమా.. టాలీవుడ్ తో పాటు.. బాలీవుడ్ లోనూ అనేక పెద్ద విజయం అందుకుంది. ఎలాంటి అంచనాలు లేకుండానే బాలీవుడ్ లో విడుదలైన ఈ చిత్రం.. ఏకంగా రూ. 100 కోట్ల క్లబ్ లో చేరి అందరినీ ఆశ్చర్యపరిచింది. దీంతో సుకుమార్ ఈ సినిమా సీక్వెల్‌ ‘పుష్ప 2’ని ప్రతిష్టాత్మకంగా తీసుకున్నారు.
పాన్ ఇండియా లెవెల్ కి తగినట్టు కథలో మార్పులు చేస్తున్న‌ట్టు ప్ర‌క‌టించారు. కొన్ని కీలక పాత్రల్ని జత చేస్తోన్న డైరెక్టర్.. వాటికి ఆయా సినీ పరిశ్రమల్లోని ప్రముఖ నటీనటుల్ని రంగంలోకి దింపేందుకు సమాయత్తమవుతున్నట్టు సినీ వ‌ర్గాలు చెప్తున్నాయి.
ఈ నేపథ్యంలోనే.. ‘పుష్ప 2’కి సంబంధించి ఓ ఇంట్రెస్టింగ్ అప్డేట్ తెరమీదకొచ్చింది. ఇందులో బన్నీ ద్విపాత్రాభినయం చేయనున్నార‌నే వార్త నెట్టింట తెగ వైర‌ల్ అవుతోంది. ఒకటి కొడుకు పాత్ర కాగా.. మరొకటి తండ్రి పాత్ర అనే వాద‌న వినిపిస్తోంది. కొడుకు పాత్రలో చాలా యంగ్ గానూ, తండ్రి పాత్రలో 55 ఏళ్ల వ్యక్తిగానూ బన్నీ కనిపించనున్నట్టు టాక్ వినిపిస్తోంది. ఇందులో ఎంతవరకు నిజముందో తేలాల్సి ఉందంటున్నారు సినీ విశ్లేష‌కులు.
కాగా.. పుష్పరాజ్‌గా బన్నీ కనబర్చిన నటనా ప్రతిభకు సర్వత్రా ప్రశంసలు వెల్లువెత్తాయి. స్టార్ హీరో అయ్యుండి, అలాంటి రగ్డ్ లుక్ లో మాస్ రోల్ చేయడం నిజంగా విశేషం. నిజానికి, బన్నీ పెర్ఫార్మెన్స్ వల్లే పుష్ప అంత పెద్ద హిట్ అయ్యిందని చెప్పుకోవడంలో అతిశయోక్తి లేదు. రష్మికా మందన్న కథానాయికగా నటిస్తోన్న ఈ సినిమాకి దేవి శ్రీ ప్రసాద్ సంగీతం అందించారు.
