సాధారణంగా పోలీసులు అంటేనే ఎవరిని నమ్మరు.. అందరినీ అనుమానిస్తారని అంటుంటారు. ఏదైనా నేరం చేస్తే నింధితులను అరెస్ట్ చేస్తుంటారు. కానీ.. జంతువుల్ని,పక్షుల్ని మాత్రం అరెస్ట్ చేసిన సందర్భాలు చాలా అరుదుగా చూస్తుంటాం. ఇలాంటి ఘటనే అమెరికాలో జరిగింది. తాజాగా ఓ కోడిని అదుపులోకి తీసుకున్నారు పోలీసులు.
డిపార్ట్‌ మెంట్ ఆఫ్ డిఫెన్స్ హెడ్‌ క్వార్టర్స్ సమీపంలో ఓ కోడి అనుమానాస్పదంగా తిరుగుతోంది. గమనించిన పోలీసులు వెంటనే దాన్ని పట్టుకున్నారు. క్షుణ్ణంగా పరీక్షించారు. ఇంతకీ ఆ కోడి ఎవరిది..? అంత సెక్యూరిటీ ఏరియాలోకి ఎలా వచ్చింది..? ఈ కోడి వెనుక ఉగ్రవాదుల హస్తం ఉందా..? అనే కోణాల్లో పరిశీలించారు.
ఈ విషయాన్ని వర్జీనియాలోని ఆర్లింగ్టన్‌ కు చెందిన జంతు సంక్షేమ సంఘం సోషల్ మీడియాలో పోస్ట్ చేసింది. భద్రతా తనిఖీ కేంద్రం వద్ద ఓ కోడి అనుమానంగా తిరుగుతోందని.. దానిని తీసుకెళ్లేందుకు తమ అధికారులను పిలిచారని జంతు సంరక్షణ సంఘంలోని ఓ ఉద్యోగి తన ఫేస్‌ బుక్ పేజీలో పోస్ట్ చేశాడు.
గోధుమ రంగు ఈకలు కలిగిన ఈ కోడి పేరు హెన్నీ పెన్నీ. ఈ కోడిని పశ్చిమ వర్జీనియాలో ఓ రైతు నిర్వహిస్తున్న కోళ్ల ఫామ్‌ నుంచి వచ్చినట్లుగా తెలుస్తోంది. రైతుకు ఈ కోడి అంటే చాలా ఇష్టమట. అందుకే దానికి ముద్దుగా హెన్నీ పెన్నీ అని పేరు పెట్టుకుని పెంచుకుంటున్నాడని చెప్పున్నారు జంతు సంరక్షణ శాఖ అధికారులు.
