ఇల్లుకట్టి చూడు పెళ్ళిచేసి చూడు అన్నారు.మనిషి జీవితంలో ఇల్లు కట్టడం అనేది ప్రధాన విషయంగా పెద్దలు చెబుతారు. కొన్ని మధ్యతరగతి కుటుంబాలు ఇల్లు కట్టడం కోసం వలసపోతాయి.అక్కడ ఊడిగం చేసి సంపాదించిన డబ్బుతో తమ సొంతింటి కల నెరవేర్చుకుంటాయి.
అంత కష్టపడి కట్టుకున్న ఇంటిని.. ఏదో అవసరం కోసమని, ఉద్యోగరీత్యా మరో ప్రాంతానికి వెళ్లిపోవాల్సిన పరిస్థితులు తలెత్తినప్పుడో అమ్ముకోవడానికి మనసు అంగీకరించదు. ఎందుకంటే ఆ ఇంటితో ఎన్నో జ్ఞాపకాలు ముడిపడి ఉంటాయి.
అన్నేళ్లపాటు ఆ ఇంటితో అల్లుకున్న అనుబంధాలు మరిచిపోవడం అంత సులభం కాదు. కానీ, పారిశ్రామికవేత్త ఆనంద్ మహీంద్రా షేర్ చేసిన వీడియో చూస్తే ఈ బాధ తొలగిపోతుంది.
కోరుకున్న చోటికి సులభంగా తీసుకెళ్లి నిమిషాల వ్యవధిలో ఏర్పాటు చేసుకోవడమే ఈ ఇంటి ప్రత్యేకత. దీన్ని ఫోల్డబుల్ హౌస్ గా చెబుతారు. 500 చదరపు అడుగుల విస్తీర్ణంలో స్టూడియో అపార్ట్ మెంట్ మాదిరిగా ఉంటుంది. చిన్న కుటుంబానికి సరిపోతుంది. లేదంటే బ్రహ్మచారులకు అనుకూలం. దీని ధర 49,500 డాలర్లు. అంటే మన రూపాయిల్లో సుమారు రూ.40 లక్షలు .
‘‘దీన్ని భారత్ లో మరిత చౌకగా తయారు చేయవచ్చు. విపత్తుల తర్వాత వేగంగా షెల్టర్ ఏర్పాటుకు ఈ నమూనా చక్కగా సరిపోతుంది. అందుబాటు ధరలకే ఇళ్ళను అందించాలన్న మన సమస్యలకు ఆవిష్కరణలే సమాధానం అవుతాయి’’
అని ఆనంద్ మహీంద్రా ట్వీట్ చేశారు. దీని పేరు బాక్సబుల్ ఫోల్డింగ్ హౌస్. ఈ చిన్ని ఇంట్లో ఒక ఓపెన్ కిచెన్, బెడ్ రూమ్, హాల్ ఉంటాయి. దీన్ని ఫోల్డ్ చేసి, కావాల్సిన చోట అన్ ఫోల్డ్ చేసుకోవడమే. మరిన్ని వివరాలను https://www.boxabl.com/ పోర్టల్ నుంచి తెలుసుకోవచ్చు.
An un-foldable, 500 sq ft house for about 40L rupees. Probably could be manufactured even cheaper in India. Perfect for post-disaster shelters also. Innovation is the answer to our problems of providing affordable homes. pic.twitter.com/1CRPPpvla1
— anand mahindra (@anandmahindra) January 12, 2023