జనసేన పార్టీ అధినేత పవన్ కళ్యాణ్ చేసిన వ్యాఖ్యలపై ఏపీ మంత్రి అంబటి రాంబాబు రియాక్ట్ అయ్యారు. పవన్ రాజకీయాల్లో ఫెయిల్ అయ్యాననడం వాస్తవమని పేర్కొన్నారు. పవన్ కేవలం నటుడిగానే సక్సెస్ అయ్యారని వెల్లడించారు. రాజకీయాల్లో ఎప్పటినుంచో ఉన్న పవన్ ఒక్కసారి కూడా గెలిచింది లేదంటూ సెటైర్లు వేశారు మంత్రి.
ఇకపై కూడా పవన్ కళ్యాణ్ రాజకీయాల్లో సక్సెస్ అయ్యే అవకాశాలు లేవని వ్యాఖ్యానించారు. విప్లవనేతగా పార్టీని ఏర్పాటు చేసిన.. పవన్ తనను తాను చేగువేరా అని చెప్పుకుంటున్నాడు. కానీ సిద్ధాంతాలను పక్కన బెట్టి కమ్యునిస్టులతోనూ.. బీజేపీతోనూ కలిశారని ఆరోపించారు.
సైద్ధాంతిక విధానం అంటూ ఏమీ లేని పవన్.. రాజకీయల్లో తన పాత్రను సరిగా పోషించలేకపోతున్నారని విమర్శించారు. పవన్ ఎప్పటికీ ఫెయిల్యూర్ నాయకుడేనని స్పష్టం చేశారు ఏపీ మంత్రి అంబటి రాంబాబు.
కాగా పవన్ కళ్యాణ్ శనివారం హైదరాబాద్ శిల్పకళావేదికలో జరిగిన సీఏ విద్యార్థుల అంతర్జాతీయ సదస్సులో రాజకీయాలపై ఇంట్రెస్టింగ్ కామెంట్స్ చేశారు. ఇప్పటివరకూ తాను ఒక ఫెయిల్యూర్ రాజకీయ నాయకుడినని.. పరాజితుడినని చెప్పేందుకు తనకెలాంటి మొహమాటం లేదని వ్యాఖ్యానించారు.