జనసేన అధినేత పవన్ కళ్యాణ్‌పై ఏపీ మంత్రి గుడివాడ అమర్నాథ్ మండిపడ్డారు. కాపు కులాన్నంతా మూట కట్టి తీసుకెళ్లి చంద్రబాబు కాళ్ళ దగ్గర పెట్టేద్దామనే ఆలోచన ఏమో.. వైఎస్సార్‌సీపీ తప్ప బీజేపీ, సీపీఐ, సీపీఎం, బీఎస్పీతో పాటు అన్ని రాజకీయ పార్టీలతో పొత్తు పెట్టుకున్నావన్నారు. ఈసారి ప్రజలు బెండు తీయడం ఖాయం అన్నారు. చంద్రబాబు ఇచ్చే ప్యాకేజీ తీసేసుకో.. ఇవ్వాల్సిన అందరికీ భరణాలు ఇచ్చేసేయ్ అన్నారు. ముత్తైదువులను పక్కన కూర్చోబెట్టుకుంటావు అందులోకి ఒక వెన్నుపోటు దారుడు ఉంటాడు అంటూ సెటైర్లు పేల్చారు.
ఎన్నికల్లో ఒంటరిగా పోటీ చేస్తే వీరమరణం తప్పదనే విషయాన్ని పవన్ కల్యాణ్‌ ముందే ఒప్పేసుకున్నారంటూ మంత్రి కామెంట్స్ చేశారు. ఐటీ శాఖ మంత్రి పేరు తెలియదు.. కనీసం భార్యల పేర్లైనా గుర్తున్నాయా అంటూ ఘాటు వ్యాఖ్యలు చేశారు. వాళ్ల పేర్లు గుర్తుపెట్టుకోవాలి కదా.. బహుశా ప్యాకేజీ ఇచ్చిన చంద్రబాబు పేరు మినహా ఎవరి పేరు గుర్తుండదేమో అన్నారు.
పవన్ కళ్యాణ్ ఉన్న 175 నియోజకవర్గాల పేర్లు చెబితే తాను రాజకీయాలు వదిలేసి వెళ్ళిపోతాను అన్నారు. యువశక్తి సభ ప్రారంభంలో తనకన్నా పోరాడేవాడు మరెవరూ లేరని గొప్పలు చెప్పిన పవన్.. చివరికి ఒంటరిగా పోరాటం చేస్తే వీరమరణం తప్పదంటూ, తానొక ప్యాకేజీ స్టార్‌నని చెప్పకనే చెప్పారని ఘాటు వ్యాఖ్యలు చేశారు. ముఖ్యమంత్రిగా రాజ్యాంగ పదవిలో ఉన్న వ్యక్తిపై నోటికొచ్చినట్లు మాట్లాడారని.. సీఎంను కొడతానన్నారని.. చెప్పుతో కొట్టాలన్నారని.. తమకు చెప్పులు, చేతులు లేవా అన్నారు.
జనాలపై తనకు నమ్మకం లేదు కాబట్టి ఒంటరిగా పోరాడాల్సిన అవసరం లేదని చెప్పి పొత్తులతో పోటీ చేస్తానని చెప్పారని మంత్రి వ్యాఖ్యానించారు. సమస్యలపై ప్రశ్నిస్తానని సమావేశం పెట్టి ప్రజా సంక్షేమానికి పథకాలను అమలు చేస్తున్న సీఎం జగన్‌ను తిట్టారని.. చంద్రబాబు రాసిచ్చిన స్క్రిప్టును యథాతథంగా చదివారన్నారు. పొత్తు కోసం వైఎస్సార్‌సీపీని తప్ప ఏ పార్టీనీ వదల్లేదన్నారు. ముఖ్యమంత్రి వైఎస్ జగన్ అమలు చేస్తున్న సంక్షేమ పథకాలు, అద్భుతమైన ప్రజా మోద కార్యక్రమాల వల్ల 2024లో కూడా ఆయనే ముఖ్యమంత్రి అవుతారని ధీమాను వ్యక్తం చేశారు.