– రగులుతున్న జగిత్యాల
– జిల్లావ్యాప్తంగా నిరసనల వెల్లువ
– ఎక్కడికక్కడ రాస్తారోకోలు
– నడిరోడ్డుపైనే వంటావార్పు
– కొప్పుల కాన్వాయ్ ముందు రైతుల బైఠాయింపు
– చేసేది లేక వెనుదిరిగిన మంత్రి
జగిత్యాల మాస్టర్ ప్లాన్ రద్దు కోసం అన్నదాతల ఆందోళన కొనసాగుతూనే ఉంది. రోజుకో వినూత్న రీతిలో వారు చేస్తున్న పోరాటం తెలంగాణ ఉద్యమాన్ని గుర్తుకు తెస్తుంది. అప్పట్లో స్వరాష్ట్ర సాధన కోసం రోడ్డుపై వంటావార్పు కార్యక్రమం నిర్వహిస్తే ఇప్పుడు తమ భూములు కాపాడుకునేందుకు అదే బాట పట్టారు అన్నదాతలు.
మాస్టర్ ప్లాన్ రద్దు కోసం జగిత్యాల అష్టదిగ్బంధనానికి పిలుపునిచ్చిన నేపథ్యంలో రైతులు రోడ్లపైకి వచ్చి ధర్నా నిర్వహిస్తున్నారు. అంబారీ పేట, హుస్నాబాద్ అన్నదాతలు జగిత్యాల నిజామాబాద్ రహదారిపై బైఠాయించారు. అటు తిమ్మాపూర్, మోతె గ్రామస్తులు సైతం జగిత్యాల పెద్దపల్లి రహదారిపై ధర్నాకు దిగారు. నడిరోడ్డుపై వంట వండుకొని రోడ్డుపైనే కూర్చుని తిన్నారు. జై జవాన్, జై కిసాన్ నినాదాలతో హోరెత్తించారు.
మరోవైపు మాస్టర్ ప్లాన్ కు వ్యతిరేకంగా మిగతా గ్రామాల్లోనూ ఆందోళనలు మిన్నంటాయి. అన్నదాతల ఆందోళన నేపథ్యంలో భారీగా ట్రాఫిక్ జాం అయింది. వాహనాలు బారులు తీరి ఇబ్బంది కలుగుతున్నా ప్రయాణికులు మాత్రం రైతులకు మద్దతుగా నిలుస్తున్నారు. ప్రభుత్వం ఇప్పటికైనా స్పందించి రైతుల డిమాండ్ మేరకు మాస్టర్ ప్లాన్ రద్దు చేయాలని కోరుతున్నారు. మరో వైపు నర్సింగాపూర్ లో గ్రామ పంచాయతీ కార్యాలయానికి తాళం వేసి నిరసన తెలిపారు. మాస్టర్ ప్లాన్ రద్దు చేసే వరకు నిరసనలు కొనసాగిస్తామని రైతులు స్పష్టం చేశారు.
ఇక ఇలా ఉంటే జగిత్యాల జిల్లాలో మంత్రి కొప్పుల ఈశ్వర్ కు నిరసన సెగ తాకింది. జిల్లా కేంద్రంలో కంటి వెలుగు శిబిరాన్ని ప్రారంభించేందుకు వెళ్తుండగా.. మార్గం మధ్యలో మంత్రిని రైతులు అడ్డుకున్నారు. మాస్టర్ ప్లాన్ ను రద్దు చేయాలంటూ రోడ్డుపైనే బైఠాయించారు. దీంతో చేసేదేం లేక మంత్రి వెనుదిరిగారు. ఇవాళ మాస్టర్ ప్లాన్ కు వ్యతిరేకంగా జగిత్యాల జిల్లా అష్టదిగ్బంధనానికి రైతు జేఏసీ నాయకులు పిలుపునివ్వడంతో పలు గ్రామాల రైతులు రాస్తారోకోలు చేపట్టారు. ఈ క్రమంలో మంత్రి కంటి వెలుగు కార్యక్రమాన్ని వాయిదా వేసుకున్నారు. మాస్టర్ ప్లాన్ ను రద్దు చేయాలంటూ ఈ నెల 7 నుంచి ఈ ఆందోళనలు కొనసాగుతున్నాయి. దీంతో జిల్లా వ్యాప్తంగా నిరసనలు వెల్లువెత్తాయి.