–అమెరికా హెచ్చరికలు నిజమే
–తమ దేశంపై యుద్ధానికి రష్యా సిద్ధం అయిందన్న ఉక్రెయిన్ అధ్యక్షుడు
–బుధవారం యుద్ధానికి దేశంలోకి రష్యా వస్తున్నట్టు వొలోదిమిర్ జెలన్‌ స్కీ వెల్లడి
రష్యా-ఉక్రెయిన్ మ‌ధ్య యుద్ధ వాతావరణం రేకెత్తిస్తోంది. ఉక్రెయిన్ సరిహద్దుల్లో భారీ ఎత్తున రష్యా బలగాలను మోహరించడం, ఆ దేశంలోకి చొచ్చుకెళ్లేందుకు సిద్ధం కావ‌డం వంటి పరిణామాలు అంత‌ర్జాతీయంగా ఆందోళ‌నలు క‌లిగిస్తోంది. ఉక్రెయిన్ పై రష్యా ఏ క్షణ‌మైనా దాడి చేసే ముప్పు ఉంద‌ని ఇప్పటికే అమెరికా కూడా హెచ్చరించింది.
తాజాగా.. ఉక్రెయిన్ అధ్యక్షుడు వొలోదిమిర్ జెలన్‌ స్కీ కూడా ఇదే విష‌యాన్ని తెలుపుతూ ఫేస్‌ బుక్‌ లో ఓ పోస్ట్ చేశారు. బుధవారం ఉక్రెయిన్ పై రష్యా బలగాలు దాడికి దిగుతాయని తమకు సమాచారం అందిందని అతను పోస్ట్ చేశారు. దేశ ప్రజలంతా ఐకమత్యంగా ఉంటూ.. ఐక్యతా దినోత్సవం జరుపుకోవాలని ఆయన సూచించారు.
రష్యా-ఉక్రెయిన్ ల మ‌ధ్య ప‌రిస్థితులు ఆందోళ‌న‌క‌రంగా మారాయి. దీంతో ఉక్రెయిన్ రాజధాని కీవ్ లో ఉన్న అమెరికా రాయబార కార్యాలయాన్ని పశ్చిమాన ఉన్న లివివ్ నగరానికి తరలిస్తున్నట్లు అమెరికా విదేశాంగ మంత్రి ఆంటోనీ బ్లింకన్ తెలిపారు. తాత్కాలికంగా ఈ చ‌ర్యలు తీసుకుంటున్నట్లు ఆయన వెల్లడించారు. రష్యా బలగాల మోహ‌రింపు కార‌ణంగా తమ దేశ అధికారుల భద్రత దృష్ట్యా ఈ చ‌ర్యలు తీసుకుంటున్నట్లు తెలిపారు.
కాగా.. రష్యా ఇప్పటికే సరిహద్దుల్లో లక్షకు పైగా సైనిక బలగాలతో మోహరించింది. దీనిపై నాటో దేశాలు అప్రమ‌త్తమ‌య్యాయి. ఉక్రెయిన్ పై రష్యా దాడి చేయడానికి సిద్ధమైంద‌ని అమెరికా ప‌లుసార్లు ప్రక‌టించింది. అయితే.. అమెరికా ప్రక‌ట‌న‌ను రష్యా మాత్రం కొట్టిపారేస్తోంది. రష్యా దాడికి దిగితే తీవ్ర పరిణామాలు ఉంటాయ‌ని అమెరికా హెచ్చరిస్తోంది. అయిన‌ప్పటికీ.. ఉక్రెయిన్ సరిహద్దుల వ‌ద్ద రష్యా తమ బలగాలను భారీగా మోహ‌రిస్తోంది. బెలారస్‌ లో ఉక్రెయిన్ సరిహద్దులకు 25 కిలోమీటర్ల దూరంలో భారీగా రష్యా దళాలు ఉన్నాయి.
రష్యా దళాలు ఉక్రెయిన్ ను ఉత్తర, తూర్పు, దక్షిణ దిశల నుంచి చుట్టుముడుతున్నాయి. రష్యాను సమర్థంగా అడ్డుకుంటామని ఉక్రెయిన్ అధ్యక్షుడు ఇటీవ‌ల ప్రక‌టించారు. రష్యా ఆక్రమించుకున్న క్రిమియా సరిహద్దుల సమీపంలో ఉక్రెయిన్ దళాలు ఇప్పటికే కవాతు నిర్వహించాయి. ఇందులో ఉక్రెయిన్ అధ్యక్షుడు సైనిక దుస్తుల్లో పాల్గొన్నారు. ఇప్పటికే అక్కడి పరిణామాలపై అమెరికా అధ్యక్షుడు జో బైడెన్‌ తో ఫోనులో మాట్లాడారు.