ఆస్కార్‌ అవార్డ్స్‌ 2022 వేడుకలో హాలీవుడ్‌ స్టార్ హీరో విల్ స్మిత్ చర్య ప్రపంచవ్యాప్తంగా చర్చనీయాంశమైంది. 92వ అకాడమీ అవార్డుల వేదికపై విల్ స్మిత్, అమెరికన్‌ కమెడియన్‌ క్రిస్ రాక్‌ చెంప చెళ్లుమనిపించారు. అయితే, ఈ ఘటన పట్ల సర్వత్రా విమర్శలు వ్యక్తమవుతున్నాయి. అలాగే, ఈ ఘటనపై ఆస్కార్‌ అకాడమీ తీవ్ర అసంతృప్తి, ఆగ్రహంతో ఉన్నట్లు తెలుస్తోంది. దీంతో హాట్‌ టాపిక్‌గా మారింది. ఈ క్రమంలోనే విల్ స్మిత్‌పై త్వరలోనే తగిన చర్యలు తీసుకునే అవకాశాలు కనిపిస్తున్నాయి. దీంతో అతడి అవార్డుపై ఇప్పుడు సందిగ్ధత నెలకొంది. ఉత్తమ నటుడిగా స్మిత్‌కు అందజేసిన ఆస్కార్‌ను వెనక్కి తీసుకునే అవకాశాలున్నట్లు వార్తలు వినిపిస్తున్నాయి.
ఆస్కార్‌ వేడుకలో జరిగిన ఘటనపై అకాడమీ గవర్నర్ల బోర్డు బుధవారం సమావేశమై సుదీర్ఘంగా చర్చలు జరిపింది. క్రిస్ రాక్‌పై చేయి చేసుకున్నందుకు గానూ స్మిత్‌పై చర్యలు తీసుకోవాలని ఈ సమావేశంలో నిర్ణయించింది. “వ్యక్తిపై భౌతిక దాడికి దిగడం, బెదిరింపు ప్రవర్తనతో కూడిన స్మిత్ ప్రవర్తనా నియమావళిని ఉల్లంఘించారు. ఇందుకు గానూ ఆయనపై క్రమశిక్షణా చర్యలు మొదలుపెట్టాం. ఆయనపై సస్పెన్షన్‌, బహిష్కరణ లేదా ఇతర ఆంక్షలు విధించే అవకాశాలున్నాయి. ఏప్రిల్‌ 18న జరిగే బోర్డు సమావేశంలో దీనిపై నిర్ణయం తీసుకుంటాం. ఈ ఘటనపై స్మిత్ 15 రోజుల్లోగా లిఖితపూర్వక సమాధానం ఇవ్వాల్సి ఉంటుంది” అని సమావేశం అనంతరం అకాడమీ ఓ ప్రకటనలో వెల్లడించింది.
ఇక అకాడమీ ఆఫ్‌ మోషన్‌ పిక్చర్‌ ఆర్ట్స్‌ అండ్ సైన్సెస్‌(ఏఎమ్‌పీఏఎస్‌) అధ్యక్షుడు డేవిడ్‌ రూబిన్‌ అకాడమీ సభ్యులకు తాజాగా ఓ లేఖ పంపారు. విల్ చేయి చేసుకోవడంపై అకాడమీ తగిన చర్యలు తీసుకుంటుందని భావిస్తున్నట్లు అందులో తెలిపారు. “2021 సినీ రంగంలో అద్భుతమైన ప్రతిభ కనబర్చిన అనేక మంది వ్యక్తులను సత్కరించేందుకుగానూ ఆదివారం 94వ ఆస్కార్‌ వేడుకలు నిర్వహించాం. కానీ ఇలాంటి వేదికపై ఓ నామినీ ఆమోదయోగ్యం కానీ, హానికరమైన ప్రవర్తనతో మేము కలత చెందాం. విల్ స్మిత్ చేయి చేసుకోవడాన్ని మేము ఖండిస్తున్నాం. విల్ హద్దు మీరి ప్రవర్తించారు. నియమనింబంధనల్లో భాగంగా అకాడమీ గవర్నర్ల బోర్డు విల్ స్మిత్‌పై తగిన చర్యలు తీసుకోవాలి.” అని అధ్యక్షుడు డేవిడ్‌ ఆ లేఖలో పేర్కొన్నారు.
ఇటీవల 94వ ఆస్కార్‌ అవార్డుల ప్రదానోత్సవంలో భాగంగా వ్యాఖ్యాత, కమెడియన్‌ క్రిస్ రాక్‌ ఓ కామెడీ ట్రాక్‌ను చెబుతూ అందులో విల్ స్మిత్ సతీమణి జాడా పింకెట్‌ ప్రస్తావన తీసుకొచ్చారు. అలోపేసియా అనే అనారోగ్య సమస్య కారణంగా జాడా పూర్తిగా గుండుతో కన్పించడంతో.. క్రిస్ రాక్‌ ఆమెను ‘జీ.ఐ.జేన్‌’ చిత్రంలో ‘డెమి మూర్‌’ పోషించిన పాత్రతో పోల్చారు. దీంతో సహించలేకపోయిన విల్ స్మిత్ నేరుగా వేదికపై వెళ్లికి క్రిస్ చెంప ఛెళ్లుమనిపించారు. ఈ ఘటన జరిగిన కొద్ది సేపటి తర్వాత విల్ స్మిత్ ఉత్తమ నటుడిగా ఆస్కార్‌ అందుకున్నారు. అయితే ఈ ఘటనపై వేదికపైనే స్పందించిన స్మిత్ అకాడమీకి, సహచరులకు క్షమాపణలు తెలిపారు.
ఆ మరుసటి రోజు ఇన్‌స్టాగ్రామ్‌ వేదికగా స్పందిస్తూ క్రిస్ రాక్‌కు బహిరంగ క్షమాపణలు చెప్పారు. తన భార్యపై జోకులు వేయడంతో భరింలేకే అలా ప్రవర్తించానని రాసుకొచ్చారు. ఈ వ్యవహారం కాస్తా తీవ్ర వివాదానికి దారితీసింది. తర్వాత మాట్లాడుతా: క్రిస్ రాక్‌ ఈ ఘటన తర్వాత తొలిసారిగా క్రిస్ రాక్‌ ఓ కామెడీ క్లబ్‌లో పాల్గొనగా అక్కడ ఆయనకు హృదయపూర్వక స్వాగతం లభించింది. ఈ సందర్భంగా ‘చెంపదెబ్బ’పై ఆయన స్పందిస్తూ.. “అప్పుడు ఏం జరిగిందా అని ఇంకా ఆలోచిస్తూనే ఉన్నా. దీనిపై నేను తర్వాత మాట్లాడుతా” అని అన్నారు