ప్రజా సమస్యలను వివరిస్తూ.. ప్రభుత్వాన్ని నిలదీస్తూ.. కొద్దిరోజులుగా సీఎం కేసీఆర్ కు బహిరంగ లేఖలు రాస్తున్న బీజేపీ రాష్ట్ర అధ్యక్షుడు బండి సంజయ్.. ఈసారి ప్రశ్నలు సంధించారు. ‘కేసీఆర్ సారూ… వీటికి జవాబు చెప్పండి’ అంటూ ముఖ్యమంత్రికి 10 ప్రశ్నలు వేశారు బండి సంజయ్.
కేసీఆర్ కు బండి వేసిన 10 ప్రశ్నలు ఇవే..
1. ‘కేసీఆర్ జమానా – అవినీతి ఖజానా’… అని సకల జనులు తెలంగాణలో ఘోషిస్తున్నారు..? దీనికి మీ జవాబు ఏంటి..?
2. కేసీఆర్ గారు మీరు నివసిస్తున్న ప్రగతి భవన్ ‘అవినీతి భవన్’గా, ‘తెలంగాణ ద్రోహులకు నిలయం’గా మారింది అన్నది వాస్తవం..? దీనికి మీ సమాధానం ఏంటి..?
3. దేశంలోనే అత్యంత అవినీతిపరుడు, ధనవంతుడు కేసీఆర్ అని పేరుంది… దీనికి మీరు స్పందించి, మీ నిజాయితీని, సచ్ఛీలతను నిరూపించుకుంటారా..?
4. 2014లో ముఖ్యమంత్రి పదవి చేపట్టే నాటికి మీ ఆస్తులు, మీ కుటుంబ సభ్యులు, మీ బంధువుల ఆస్తులు ఎంత..? ఇప్పుడు ఎంత..? మీ ఆస్తులు లక్ష రెట్లు పెరిగిన మాట నిజం కాదా..? దీనిపై చర్చకు మీరు సిద్ధమా..?
5. కాళేశ్వరం ప్రాజెక్ట్ రీడిజైన్ పేరిట అంచనాలు పెంచి కోట్ల రూపాయల ప్రజాధనాన్ని మీరు కొల్లగొట్టారా లేదా..?
6. పాలమూరు-రంగారెడ్డి ప్రాజెక్టు, ఇతర సాగునీటి ప్రాజెక్టుల నిర్మాణంలో, మిషన్ భగీరథ, మిషన్ కాకతీయ, విద్యుత్ ప్రాజెక్టుల, విద్యుత్ కొనుగోళ్లు, ప్రభుత్వ భూముల అమ్మకాల్లో కోట్ల రూపాయల అవినీతి జరిగింది. వాటికి సంబంధిచిన ఫైల్స్, సంబంధిత పత్రాలు అఖిలపక్షం ముందు పెట్టి దీనిపై చర్చించడానికి మీరు వస్తారా..?
7. మీ కుటుంబ సభ్యులు, బంధువులు, మీ పార్టీకి చెందిన నాయకులు, కార్యకర్తలు చేస్తున్న ఇసుక, లిక్కర్, డ్రగ్స్ దందాలు, భూకబ్జాలపై స్వతంత్ర సంస్థతో దర్యాప్తు జరిపించి అవినీతి, అక్రమాలు జరగడం లేదని మీరు నిరూపించుకోగలరా..?
8. మీరు ముఖ్యమంత్రి పదవి చేపట్టిన తర్వాత ఓటుకు నోటు పథకాన్ని ప్రవేశపెట్టి సంపాదించిన కోట్ల రూపాయల అక్రమ సొమ్ముతో సాధారణ ఎన్నికలు, ఉప ఎన్నికల్లో కోట్ల రూపాయలు ఖర్చు చేస్తున్నమాట వాస్తవం కాదా..?
9. ఇతర పార్టీల్లో గెలిచిన ఎమ్మెల్యేలు, ఎంపీలు, ఎమ్మెల్సీలు, ఇతర ప్రజాప్రతినిధులను మీ అవినీతి సొమ్ముతో సంతలో సరకులాగా కొనుగోలు చేసి ప్రజాస్వామ్యాన్ని అపహాస్యం చేస్తున్న మాట నిజం కాదా..?
10. బంగారు తెలంగాణ చేస్తానని, అక్రమ మార్గాల ద్వారా కోట్ల రూపాయల ప్రజాధనాన్ని కొల్లగొట్టి మీ కుటుంబాన్ని, మీ బంధువులను, మీ పార్టీ వారిని బంగారుమయం చేసి ప్రజలను బికార్లుగా మార్చిన ఘనత మీది కాదా..?
బాధ్యత గల పార్టీగా ప్రజల పక్షాన బీజేపీ తరఫున బుధవారం కూడా మరిన్ని ప్రశ్నలు సంధిస్తానంటూ ఓ లెటర్ విడుదల చేశారు బండి సంజయ్. మరి.. దీనిపై కేసీఆర్ స్పందించి సమాధానం చెబుతారా..? లేక ఎప్పటిలాగే టీఆర్ఎస్ నేతలు ప్రెస్ మీట్ పెట్టి నాలుగు తిట్లు తిట్టి ఇష్యూని డైవర్ట్ చేస్తారా..? అనేది ఆసక్తికరంగా మారింది.
