స్నేహితులతో దాగుడు మూతలు ఆడుతూ ఏకంగా వేరే దేశానికి వెళ్లాడు ఓ కుర్రాడు. వారం రోజుల పాటు కంటైనర్ లో ఇరుక్కుపోయాడు. తినడానికి తిండి లేదు. తాగడానికి నీళ్లు లేవు.. అరిచినా ఎవరికీ విడపడదు. చివరికి అలా కంటైనర్ లోనే ఉండిపోయాడు. వివరాల్లోకి వెళ్తే.. బంగ్లాదేశ్ చిట్టగాంగ్ కు చెందిన ఫాహిమ్ అనే పదిహేనేళ్ల అబ్బాయి ఈ నెల 11న తన ఫ్రెండ్స్ కలిసి దాగుడు మూతలు ఆట మొదలు పెట్టాడు.
స్నేహితులంతా తలా ఓ చోట దాక్కోవడంతో ఫాహిమ్ దగ్గర్లోనే ఉన్న ఓ కంటైనర్ లోకి వెళ్లి దాక్కున్నాడు. ఇంతలో నిద్ర ముంచుకురావడంతో అందులోనే నిద్రపోయాడు. దురదృష్టవశాత్తూ ఫాహిమ్ ను గమనించని పోర్ట్ సిబ్బంది ఆ కంటైనర్ కు తాళమేసి మలేషియా వెళ్లే ఓడలోకి చేర్చారు.
వారం రోజుల పాటు ఫాహిమ్ కంటైనర్ లోనే ఉండిపోయాడు. తినడానికి తిండి, నీళ్లు లేకపోవడంతో ఫాహిమ్ నీరసించి పోవడంతో జ్వరం కూడా వచ్చింది. మలేషియా చేరాక కంటైనర్ తెరిచిన సిబ్బందికి లోపల ఫాహిమ్ కనిపించడంతో ఆశ్చర్యానికి లోనయ్యారు. తొలుత మానవ అక్రమ రవాణా కేసుగా భావించామని అధికారులు చెప్పారు.
నీరసం, జ్వరంతో బాధపడుతున్న ఫాహిమ్ ను ఆసుపత్రిలో చేర్చి, చికిత్స అందించామని వివరించారు. కొద్దిగా కోలుకున్నాక ఫాహిమ్ అసలు విషయం చెప్పడంతో బంగ్లాదేశ్ అధికారులకు సమాచారం అందించామని తెలిపారు. పూర్తిగా కోలుకున్నాక ఫాహిమ్ ను బంగ్లాదేశ్ కు తిరిగి పంపించేస్తామని మలేషియా అధికారులు పేర్కొన్నారు.