ఇంతకీ డెత్‌టోల్ ఎంత?

రాజమహేంద్రవరం: బోటు ప్రమాదంలో గల్లంతైన వారి సంఖ్యపై ఇప్పటికీ గందరగోళం నడుస్తోంది. బాధితులు వచ్చి చెబితేనే ఆ సంఖ్యకు జత చేస్తూ వెళుతున్నారు. పోలీసు విచారణ ద్వారా ఎంతమంది అనేది ఇప్పటివరకు తేల్చలేదు. బోటులో ఉన్న సిబ్బంది కొందరు సురక్షితంగా బయటకు వచ్చారని మొదట్లో అధికారులు చెప్పారు. బోటు నడిపిన యజమాని దగ్గర కూడా సరైన లెక్కలు లేవు. బోటు లోపల వున్న సిబ్బంది, లేదా ఆరోజు ఈ బోటులో జనాన్ని ఎక్కించిన సిబ్బందికి మాత్రమే అసలు సంఖ్య తెలిసే అవకాశం వుంటుంది. మధ్యలో వీళ్లు ఒక ప్రదేశంలో భోజనాల క్యారియర్లు బోటులో ఎక్కించుకోవడానికి ఆపుతారు. అక్కడ వీళ్లకు ఆహార పదార్ధాలు అందించే వారి దగ్గర కొంత సమాచారం వుండచ్చు. పోలీసులు ఈ కోణంలో ప్రయత్నిస్తున్నట్టు కనిపించడం లేదు. బాధిత కుటుంబాల సమాచారం ఆధారంగానే ప్రస్తుతం ప్రభుత్వ యంత్రాంగం లెక్కలు చెబుతున్నారు. అవన్నీ గాలి లెక్కలేనని చాలా స్పష్టంగా తెలుస్తోంది.  ప్రభుత్వం చెప్పే లెక్కల్లో కూడా తేడా వుంది. తొలుత 73 మంది అని తేల్చారు. మెజిస్టీరియల్‌ దర్యాప్తు కోసం ప్రభుత్వం జారీ చేసిన జీవోలో మాత్రం 61 మంది ప్రయాణికులు ఉన్నట్టు పేర్కొన్నారు. జిల్లా అధికారులతో వేసిన కమిటీకి సంబంధించి జారీ చేసిన జీవోలో 73 మందిగా చెప్పారు. బోటు ప్రమాదం నుంచి బయటపడిన తిరుపతికి చెందిన మధులత అనే మహిళ 85 మందిపైనే ఉంటారని చెప్పారు. ఇక మాజీ ఎంపీ హర్షకుమార్‌ 93 మంది ఉన్నారని ఆరోపించారు. శుక్రవారం రాజమహేంద్రవరంలో వ్యవసాయ శాఖా మంత్రి కన్నబాబు మాట్లాడుతూ 77 మంది బోటులో ఉండగా, 51 మంది గల్లంతయ్యారని, 35 మందిని కాపాడామని అన్నారు. దీంతో ఎంతమంది ఉంటారన్నది ఇప్పుడు అంతుబట్టని ప్రశ్నగా మిగిలింది.