మ‌హారాష్ట్రలోని నాసిక్ వద్ద ఘోర రోడ్డు ప్రమాదం చోటు చేసుకుంది. ఈ ప్రమాదంలో 14 మంది స‌జీవ ద‌హ‌నం అయ్యారు. నాసిక్ – ఔరంగాబాద్ రహదారిపై నందూర్నాక వద్ద శనివారం తెల్లవారుజామున ఓ ప్రైవేట్ బస్సులో ఒక్కసారిగా మంటలు చెలరేగాయి. మంటలకు బస్సు మొత్తం దగ్ధమైంది.
ఈ ప్రమాదాన్ని డిప్యూటీ కమిషనర్ ఆఫ్ పోలీస్ అమోల్ తాంబే ధృవీకరించారు. ఈ బస్సు యవత్మాల్ నుంచి ముంబై వెళ్తోంది. ఈ ప్రమాదం శనివారం తెల్లవారుజామున 4:20 గంటల సమయంలో జరిగింది. కంటైనర్‌ను ఢీకొనడంతో మంటలు చెలరేగినట్లు తెలిసింది. ప్రమాదం గురించి సమాచారం అందిన వెంటనే అగ్నిమాపక సిబ్బంది, పోలీసు బృందం సంఘటనా స్థలానికి చేరుకొని సహాయక చర్యలు చేపట్టాయి. ఈ ప్రమాదంలో గాయపడిన వారిని చికిత్స నిమిత్తం స్థానిక ఆస్పత్రికి తరలించారు. అయితే వీరిలో కొందరి పరిస్థితి విషమంగా ఉన్నట్లు స్థానిక అధికారులు తెలిపారు.
తెల్లవారు జామున కావటంతో ప్రయాణికులు గాఢనిద్రలో ఉండగా ఈ ప్రమాదం చోటుచేసుకుంది. దీంతో మృతుల సంఖ్య ఎక్కువగా ఉన్నట్లు అధికారులు పేర్కొంటున్నారు. తెల్లవారు జామున సమయంలో బస్సు వేరే వాహనాన్ని ఢీకొట్టింది. ఈ విషయాన్ని గమనించేలోపే బస్సులో మంటలు చెలరేగాయి. కిటికీలోంచి దూకి నా ప్రాణాన్ని కాపాడుకున్నానని ఓ ప్రయాణికుడు తెలిపాడు.
క్షణాల్లోనే బస్సులో మంటలు వ్యాపించాయని అన్నాడు. ప్రమాదం జరిగిన ఇరవై నిమిషాల తర్వాత అగ్నిమాపక దళం అక్కడికి చేరుకుందని బస్సు ప్రమాదం నుంచి ప్రాణాలతో బయటపడ్డ ప్రయాణికుడు స్థానిక మీడియాతో పేర్కొన్నాడు.