ఇళ్ల స్థలాలు, సంబంధిత అంశాల పరిష్కారంపై మంత్రి కేటీఆర్ తో మంత్రివర్గ ఉపసంఘం భేటీ అయింది. ఈ సమావేశంలో మంత్రులు హరీశ్‌ రావు, శ్రీనివాస్‌గౌడ్‌, తలసాని శ్రీనివాస్‌ యాదవ్‌, ఎర్రబెల్లి దయాకర్‌ రావు, పువ్వాడ అజయ్‌, మల్లా రెడ్డి, సబితా ఇంద్రారెడ్డి, సంబంధిత శాఖల ఉన్నతాధికారులు పాల్గొన్నారు.
పురపాలక శాఖ మంత్రి మంత్రి కేటీఆర్ నేతృత్వంలో హైదరాబాద్‌లోని బీఆర్‌కే భవన్‌లో ఈ సమావేశం కొనసాగగా.. ఇళ్ల స్థలాలు, 58, 59 ఉత్తర్వుల కింద క్రమబద్ధీకరణ మరియు సంబంధిత అంశాలపై ఈ భేటీలో చర్చించారు. ఇక ఇదే అంశపై ఈనెల 13న కేబినెట్‌ సబ్‌ కమిటీ భేటీ అయిన విషయం తెలిసిందే.
2023-24 వార్షిక బడ్జెట్‌లో సొంత స్థలాల్లో డబుల్‌ బెడ్‌రూమ్‌ ఇళ్లు నిర్మించుకునేందుకు రూ.7350 కోట్లు కేటాయించింది. కుటుంబానికి రూ.3 లక్షల చొప్పున ప్రభుత్వం ఆర్థికసాయం అందించనున్నది.
ఈ ఏడాది మొత్తం 4 లక్షల మంది లబ్ధిదారులకు సాయం అందించాలని నిర్ణయించిన విషయం తెలిసిందే. ఇందులో గ్రామీణ ప్రాంతాల్లో 1,78,200 మందికి, పట్టణ ప్రాంతాల్లో 2,21,800 మంది చొప్పున సాయం అందిచనున్నారు.