బాలీవుడ్ బ్యూటీ అమీషా పటేల్ మరోసారి న్యాయపరమైన చిక్కుల్లో పడింది. తాజాగా ఆమెపై చీటింగ్ కేసు నమోదైంది. ఇటీవల ఓ కార్యక్రమంలో పాల్గొనేందుకు డబ్బులు తీసుకుని.. అమీషా పటేల్ దారుణంగా మోసం చేసిందంటూ సామాజిక కార్యకర్త సునీల్ జైన్ పోలీసులకు ఫిర్యాదు చేశారు. ఈ మేరకు ఆమెపై పోలీసులు కేసు నమోదు చేశారు.
మధ్యప్రదేశ్‌లోని ఖాండ్వాలో ఓ కార్యక్రమం కోసం నిర్వాహకులు అమీషా పటేల్‌ను సంప్రదించారు. గంటసేపు ఈవెంట్‌లో పాల్గొనేందుకు ఆమె రూ.4 లక్షలు వసూలు చేసింది. తీరా ప్రాగ్రామ్‌కు వచ్చిన తర్వాత కేవలం మూడు నిమిషాలే స్టేజీపై కనిపించి మాయమైంది. దీంతో అమీషా మోసం చేసిందంటూ ప్రోగ్రాం నిర్వాహకులు పోలీసులకు ఫిర్యాదు చేశారు.
దీనిపై ట్విటర్‌ వేదికగా స్పందించిన అమీషా.. ‘ఏప్రిల్‌ 23వ తారీఖు మధ్యప్రదేశ్‌లోని ఖాండ్వా సిటీలో నవచండీ మహోత్సవాలకు హాజరయ్యాను. స్టార్‌ ఫ్లాష్‌ ఎంటర్‌టైన్‌మెంట్‌, అరవింద్‌ పాండే ఈ కార్యక్రమానికి సెక్యూరిటీ ఏర్పాటు చేయలేదు. నాకు ప్రాణ భయం పట్టుకుంది. స్థానిక పోలీసులే నా రక్షణ బాధ్యతలు చూసుకున్నారు. వారికి కృతజ్ఞతలు’ అని ట్వీట్‌ చేసింది. ప్రస్తుతం ఇందుకు సంబంధించిన పోస్ట్ నెట్టింట వైరల్ అవుతోంది.
Attended the Navchandi Mahostav 2022 yesterday 23 rd April in Khandwa city ,Madhva Pradesh … v v v v badly organised by Star Flash Entertainment and Mr Arvind Pandey .. I feared for my life but I want to thank the local police for taking care of me v well ..🙏🏻🙏🏻
— ameesha patel (@ameesha_patel) April 24, 2022
Advertisements
ఇక, ఇదే ఘటనపై మొఘట్ పోలీస్ స్టేషన్ ఇన్‌ఛార్జ్ ఈశ్వర్ సింగ్ చౌహాన్ మీడియా వేదికగా స్పందించారు. ‘సినీ నటి అమీషా పటేల్ ఈవెంట్ జరిగిన రోజు నేను కూడా అక్కడే ఉన్నాను. అక్కడ ప్రజలు గుంపులుగా ఉన్నప్పటికీ ఎలాంటి ఆందోళన, అలజడి లేదు. భయాందోళనలకు సంబంధించిన సమాచారం లేదు’ అని వివరించారు. ఇక అమీషా న్యాయపరమైన చిక్కుల్లో పడటం ఇదే మొదటిసారి కాదు. అంతకుముందు రూ. 32 లక్షల చెక్ బౌన్స్ కేసులోనూ ఇరుక్కుంది.
