దశాబ్దాలుగా సిల్వర్ స్క్రీన్‌పై కామెడీతో నవ్వించిన లెజెండరీ యాక్టర్‌ బ్రహ్మానందం. క్రియేటివ్ డైరెక్టర్ కృష్ణవంశీ దర్శకత్వం వహించిన రంగమార్తాండ చిత్రంలో మాత్రం విభిన్నంగా కనిపించారు.ఈ సారి కామెడీగా కాకుండా సీరియస్‌ పాత్రలో డిఫరెంట్‌ లుక్‌లో కనిపించారు బ్రహ్మి.
మరాఠీ సూపర్ హిట్‌ మూవీ నట సామ్రాట్‌కు రీమేక్‌గా వచ్చిన ఈ చిత్రంలో ప్రకాష్ రాజ్,బ్రహ్మానందంతోపాటూ రమ్యకృష్ణ, అనసూయ భరద్వాజ్‌, శివాత్మిక రాజశేఖర్‌, రాహుల్ సిప్లిగంజ్‌, ఆదర్శ్‌ బాలకృష్ణ కీలక పాత్రల్లో నటించారు.
ఈ చిత్రంలో ప్రకాశ్ రాజ్, బ్రహ్మానందం మధ్య సన్నివేశాలు సినిమాకే హైలెట్‌గా నిలిచాయి. బ్రహ్మానందం పోషించిన చక్రపాణి పాత్రపై ప్రేక్షకులు ప్రశంసలు కురిపిస్తున్నారు. అద్భుతమైన నటనతో ప్రేక్షకులను ఇంప్రెస్‌ చేస్తున్న బ్రహ్మానందంపై మెగాస్టార్ చిరంజీవి, రాంచరణ్‌ ప్రశంసించారు.
రంగమార్తాండ సక్సెస్‌ఫుల్‌గా స్క్రీనింగ్ అవుతున్న నేపథ్యంలో బ్రహ్మానందంకు శుభాకాంక్షలు తెలియజేస్తూ.. చిరంజీవి, రాంచరణ్‌ శాలువాతో సత్కరించారు.
లెజెండరీ కమెడియన్‌తో ఓవైపు మెగాస్టార్, మరోవైపు మెగా పవర్‌ స్టార్ ఒకే ఫ్రేమ్‌లో ఉన్న స్టిల్‌ ఇప్పుడు నెట్టింట్లో హల్‌ చల్ చేస్తోంది. బ్రహ్మానందంతో మరోవైపు చిరంజీవి సతీమణి సురేఖ, హైపర్ ఆది, వెన్నెల కిశోర్‌, శ్రీజ కలిసి దిగిన స్టిల్‌ కూడా ట్రెండింగ్ అవుతోంది.
రాంచరణ్‌ నటిస్తోన్న ఆర్‌సీ 15 లొకేషన్‌లో ఈ స్టిల్స్‌ తీసినట్టు తెలుస్తోంది. చిరంజీవి ప్రస్తుతం భోళా శంకర్‌ సినిమా షూటింగ్‌తో బిజీగా ఉండగా.. రాంచరణ్‌ ఆర్‌సీ 15 చిత్రీకరణలో పాల్గొంటున్నాడు.