అబార్షన్ హక్కులపై సుప్రీంకోర్టు ఇవ్వబోయే తీర్పుకు వ్యతిరేకంగా ఓ వ్యక్తి 60 అంతస్థుల టవర్ ఎక్కి నిరసన తెలిపాడు. ఈ విచిత్రమైన సంఘటన అమెరికాలో జరిగింది. అబార్షన్ అమెరికా సుప్రీకోర్టు ఇవ్వబోయే తీర్పు లీక్ అయింది. దీనికి వ్యతిరేకంగా పెద్దఎత్తున నిరసనలు వెల్లువెత్తుతున్నాయి. ఇందులో భాగంగా ఓ యాంటీ అబార్షన్ యాక్టివిస్ట్ శాన్‌ఫ్రాన్సిస్కోలోని 60 అంతస్తుల టవర్‌ను ఎక్కి నిరసన తెలిపాడు.
భూమికి సుమారు 1070 అడుగుల ఎత్తులో ఉన్న టవర్‌పైకి ఎక్కాడు. పైగా తనను తాను ఓ ప్రో లైఫ్ స్పైడర్ మ్యాన్‌గా అభివర్ణించుకున్నాడు. టవర్‌పై ఎక్కుతూ తన భావాలను ఎప్పటికప్పుడు తెలియజేస్తూ ఇన్‌స్టా‌గ్రామ్‌లో పోస్టులు పెట్టాడు. “నేను ఇక్కడ సేల్స్‌ఫోర్స్ టవర్‌పై ఉన్నాను.. ఇది బాగానే ఉంది” అని పోస్ట్ పెట్టాడు.
దీంతో ఆ బిల్డింగ్ కింద ఉన్న వ్యక్తులు అతని వీడియోలను తీసి సోషల్ మీడియాలో షేర్ చేశారు. అందుకు సంబంధించిన వీడియో నెట్టింట చక్కర్లు కొడుతుంది. దీనిపై వెంటనే శాన్ ఫ్రాన్సిస్కో అగ్నిమాపక విభాగం కూడా స్పందించింది. టవర్ ఎక్కిన వ్యక్తి ప్రజల భద్రతను ప్రమాదంలో పడేస్తున్నాడని.. ఈ చర్యను ఖండిస్తూ తమకు సహకరించమని కోరుతూ అగ్నిమాపక అధికారులు ట్వీట్ చేశారు.
సుమారు గంట పాటు శ్ర‌మించిన అగ్నిమాపక సిబ్బంది అతన్ని కిందకు దించారు. తర్వాత శాన్ ఫ్రాన్సిస్కో పోలీసులకు అప్ప‌గించారు. కాగా అమెరికాలో అబార్షన్ హక్కులను తొలగిస్తూ.. సంబంధిత చట్టాన్ని రద్దు చేస్తూ ఆదేశాలు ఇవ్వనున్నట్టు ఓ డ్రాఫ్ట్ లెటర్ లీక్ అయింది. దాంతో దేశవ్యాప్తంగా నిరసనలు వెల్లువెత్తుతున్నాయి.
