కరోనా మహమ్మారి నుంచి దేశం కోలుకుంటోంది అనుకునే టైమ్ లో కొత్త వేరియంట్ ఒమిక్రాన్ ఎంట్రీ ఇచ్చింది. మెల్లమెల్లగా ఒక్కో రాష్ట్రానికి పాకుతున్న ఈ మహమ్మారి.. రానున్న రోజుల్లో థర్డ్ వేవ్ కు దారి తీయొచ్చని నిపుణులు అంచనా వేస్తున్నారు. ప్రస్తుతానికి 350కి పైనే ఉన్న కేసుల సంఖ్య.. అంతకంతకూ పెరిగే ఛాన్స్ ఉందని హెచ్చరిస్తున్నారు. సరిగ్గా ఇదే టైమ్ లో అలహాబాద్ హైకోర్టు ఆసక్తికర వ్యాఖ్యలు చేసింది.
ఒమిక్రాన్ తీవ్రతపై ఆందోళన వ్యక్తం చేసిన హైకోర్టు.. ఇంకొన్ని రోజుల్లో ఐదు రాష్ట్రాల్లో జరగనున్న ఎన్నికలపై కీలక వ్యాఖ్యలు చేసింది. ప్రస్తుత పరిస్థితుల దృష్ట్యా ఉత్తరప్రదేశ్ అసెంబ్లీ ఎన్నికలను కొంతకాలం వాయిదా వేయాలని ఎలక్షన్ కమిషన్ కు సూచించింది న్యాయస్థానం. అలాగే.. కేసులు పెరుగుతున్న కారణంగా ర్యాలీలు, బహిరంగ సభలపై నిషేధం విధించాలని ప్రధాని మోడీకి తెలిపింది. ఆర్టికల్ 21 ప్రకారం అందరికీ జీవించే హక్కు ఉందని.. ప్రస్తుత పరిస్థితుల్లో బహిరంగ సభలు, ర్యాలీలు నిర్వహించడం సరికాదని అభిప్రాయపడింది. వాటికి అనుమతిస్తే యూపీలో ఒమిక్రాన్ కేసులు భారీ సంఖ్యలో నమోదయ్యే అవకాశముందని హెచ్చరించింది. ఎన్నికలను రెండు నెలల పాటు వాయిదా వేయాలని కోరింది.
ఎలక్షన్ కు కొద్ది రోజులే ఉండడంతో.. యూపీ సహా మిగిలిన గోవా, ఉత్తరాఖండ్, మణిపూర్, పంజాబ్ రాష్ట్రాల్లో ప్రచారాన్ని ముమ్మరం చేశాయి పార్టీలు. ఓటర్లను ప్రసన్నం చేసుకునేందుకు సభలు, సమావేశాలు, ర్యాలీలు నిర్వహిస్తున్నాయి. యూపీ ప్రభుత్వం.. మాజీ ప్రధాని అటల్ బిహారీ వాజ్ పేయి జయంతి డిసెంబర్ 25న భారీ బహిరంగ సభకు ఏర్పాట్లు చేసింది. కోటి మంది విద్యార్థులకు ఉచితంగా స్మార్ట్‌ ఫోన్స్, ట్యాబ్లెట్స్ ఇవ్వాలని నిర్ణయించింది. తొలి దశలో భాగంగా లక్ష మందికి శనివారం సీఎం యోగి ఆదిత్యనాథ్‌ వాటిని పంపిణీ చేయనున్నారు. సరిగ్గా ఇలాంటి సమయంలో హైకోర్టు చేసిన వ్యాఖ్యలు చర్చనీయాంశంగా మారాయి.