ఏపీలో కరోనా ఉగ్రరూపం దాల్చుతోంది. నమోదవుతున్న రోజువారీ కేసులు అధికారులను సైతం ఉక్కిరిబిక్కిరి చేస్తున్నాయి. మెట్రో నగరాలు ఉన్న రాష్ట్రాల్లో సైతం నమోదవ్వనన్ని కేసులు ఏపీ బయటపడుతున్నాయి. ఈ రోజు ఒక్కరోజే 7వేలకు చేరువలో కేసులు నమోదయ్యాయి. దీంతో అధికారులు ఒక్కసారిగా ఉలిక్కిపడ్డారు. గడచిన 24 గంటల్లో 38,055 నమూనాలు పరీక్షించగా.. కొత్తగా 6,996 కరోనా కేసులు నమోదయ్యాయి.
అటు కరోనాతో ముగ్గురు మృతి చెందారు. కొత్తగా నమోదైన కేసులతో రాష్ట్రంలో మొత్తం కరోనా బాధితుల సంఖ్య 21,14,489 కి చేరింది. కొత్తగా కరోనా నుంచి 1,066 మంది పూర్తిగా కోలుకున్నారు. ఇప్పటివరకూ 20,63,867 రికవరీ అయ్యారు. ప్రస్తుతం రాష్ట్రంలో 36,108 యాక్టివ్‌ కేసులు ఉన్నాయి. కొత్తగా నమోదైన మూడు కరోనా మరణాలో కలిపి మొత్తం 14,514 మంది మృతి చెందారు.
విశాఖ, చిత్తూరు జిల్లాలోనే గత కొన్ని రోజుల నుంచి రికార్డ్ స్థాయిలో కేసులు వెలుగు చూస్తున్నాయి. చిత్తూరు జిల్లాలో అత్యధికంగా ఒక్క రోజులో 1,534 కేసులు బయటపడగా.. విశాఖలో 1,263 మంది మహమ్మారి బారిన పడ్డారు. భారీగా కేసులు నమోదవడంతో అధికారులు అప్రమత్తం అవుతున్నారు. మాస్కులు వాడకం, భౌతిక దూరం తప్పని సరి చేశారు.
ఈ రోజు నుండి నైట్ కర్ఫ్యూ అమలు కానుంది. ఈనెల ఆఖరి వరకు రాత్రి 11 గంటల నుండి ఉదయం 5 వరకుఈ నైట్ కర్ఫ్యూ ను విదిస్తూ ఉత్తర్వులు జారీ చేసింది సర్కార్. అత్యవసర సర్వీసులకు మినహాయింపు ఇస్తూ ఈ ఉత్తర్వులు జారీ చేసింది. బహిరంగ ప్రదేశాల్లో 200 మందికి,ఇండోర్ లో 100 మందికి మాత్రమే అనుమతి కల్పించింది. అయితే అంతరాష్ట్ర రవాణాకు మాత్రం అవకాశం కల్పించింది. సినిమా థియేటర్ల లో సీటు సీటుకు మధ్య గ్యాప్ కూడా ఉండాలని పేర్కొంది.
