మద్యానికి బానిసైతే బతుకు ఎంత దుర్భరంగా మారుతుందో తెలిసిందే. కానీ మద్యం రక్కసి అనుబంధాలను ఎంతలా చిన్నాభిన్నం చేస్తుందో హైదరాబాద్‌ బాలానగర్‌ జగద్గీర్‌గుట్టలోని సీసాల బస్తీలో జరిగిన ఓ ఘటన కళ్లకు కట్టింది. మాసాని రాజు అనే వ్యక్తికి మద్యం సేవించడం అలవాటు.ఫ్రెండ్‌ సర్కిల్‌ మూలంగా ఆ వ్యసనం మరింత శృతిమించింది. పీకలదాక తాగొచ్చి ఇంట్లో నరకం చూపేవాడు. ఎదిగిన బిడ్డలున్నారే విచక్షణ కూడా లేకుండా వాళ్ల కళ్లెదుటే భార్యను హింసించేవాడు. మైకంలో కూతుళ్లపై కూడా చేయిచేసుకునేవాడు. వాళ్లు భయపడేవాళ్లు.తమను ప్రేమగా చూసుకునే తండ్రి మద్యం తాగితే రాక్షసుడిలా మారడం చూసి
తల్లిడిలిపోయారు. చేసేందేంలేక మౌనంగా అతని టార్చర్‌ను భరిస్తూ వచ్చారు.కానీ ఎన్నాళ్లని ఇలా?..తండ్రి ఆగడాలతో వాళ్లలో సహనం నశించింది. ఇన్నాళ్లు భయంతో వణికిపోయిన వాళ్లలో ఎక్కడలేని ధైర్యం వచ్చింది. వాళ్ల కోపం నాన్న మీద కాదు. అతనిలో వున్న మద్యం రక్కసిపైన. తల్లిని కొడుతున్న తండ్రిపై ఇద్దరు కూతుళ్లు అపరకాళిలా ఒక్కసారిగా విరుచుపడ్డారు. ఇన్నాళ్ల ఆవేదన ఆగ్రహంగా మారింది. వాళ్ల కోపం చల్లారేలోపే మాసాని రాజు రక్తం మడుగులో కుప్పకూలాడు. ఇరుగుపొరుగు స్పందించి హాస్పిటల్‌కు తరలించే ప్రయత్నం చేశారు.కానీ అప్పటికే మాసాని రాజు చనిపోయాడు. ఆ ఇద్దరు కూతుళ్లు వయసురీత్యా మైనర్లు.
