– నగరం చుట్టూ 10వేలకు పైగా కెమెరాలు
– రిపేర్ లో 4.4 వేలు
– సగానికి పైగా కేసుల్ని ఛేదించేది సీసీటీవీలే!
– అయినా.. పట్టించుకోని అధికారులు
– అలసత్వంపై నగరవాసుల అసహనం
హైదరాబాద్ మహానగరం మొత్తం సీసీ కెమెరాల్లో నిక్షిప్తమై ఉంది. 10,597 సీసీ కెమెరాలు వలయంలా ఏర్పడి హైదరాబాద్ ను అనుక్షణం అడుగడుగునా బంధిస్తున్నాయి. దీంతో చీమ చిటుక్కుమన్నా సీసీ కెమెరాల్లో ఇట్టే తెలిసిపోతుంది. సీసీకెమెరాలు వచ్చిన తరువాత నగరంలో జరుగుతున్న సగం కన్నా ఎక్కువ క్రైంను వీటి ఆధారంగానే పోలీసుల ఛేదిస్తున్నారు.
దీంతో ఎన్నో నేరాలకు సంబంధించిన దర్యాప్తులో సీసీటీవీ ఫుటేజీలు ఎంతో సాయపడుతున్న విషయం వాస్తవం. కానీ, ఈ సీసీటీవీ కెమెరాల నిర్వహణలో పోలీసులకు ఏ మాత్రం ఆసక్తి లేనట్టు తెలుస్తోంది. ఎందుకంటే హైదరాబాద్ లో ఏర్పాటైన సీసీటీవీ కెమెరాల్లో సగానికి సగం పనిచేయడం లేదన్న విషయం బయటకు వచ్చింది. సమాచార హక్కు చట్టం కింద ఈ వివరాలు కావాలంటూ ఎస్ క్యూ మసూద్ అనే వ్యక్తి దరఖాస్తు చేసుకోగా, హైదరాబాద్ సిటీ పోలీస్ చీఫ్ పబ్లిక్ ఇన్ఫర్మేషన్ ఆఫీసర్ నుంచి వివరాలు అందాయి.
ఈ వివరాలను మసూద్ మీడియాతో పంచుకున్నారు. హైదరాబాద్ సిటీ పోలీసు కమీషనరేట్ పరిధిలో మొత్తం 10,597 కెమెరాలు ఏర్పాటు చేశారు. వీటిల్లో ప్రస్తుతం 4,402 పని చేయడం లేదు. ప్రతి పోలీసు స్టేషన్ పరిధిలో సీసీటీవీ సిస్టమ్ అడ్మినిస్ట్రేషన్ అనే వ్యవస్థ ఉంటుంది. రోజు వారీ ఆయా సీసీటీవీ కెమెరాల పనితీరును పోలీసులు పర్యవేక్షించాలి. రోజువారీ పర్యవేక్షణ సమయంలో ఏదైనా కెమెరా పని చేయడం లేదని, విజువల్స్ రికార్డు అవ్వడం లేదని గుర్తిస్తే టెక్నీషియన్లకు చెప్పి మరమ్మతులు చేయించాలని చట్టం చెబుతోంది. అంతే కాదు ప్రతి సీసీటీవీ కెమెరాకు సంబంధించి 30 రోజుల వరకు స్టోర్ చేయాలి.
ఈ సీసీటీవీ కెమెరాలను తెలంగాణ పబ్లిక్ సేఫ్టీ మెజర్స్ ఎన్ ఫోర్స్ మెంట్ యాక్ట్ కింద ఏర్పాటు చేశారు. ఏవైనా పెద్ద నేరాలు చోటు చేసుకున్నప్పుడు సీసీటీవీ కెమెరాలు కీలకంగా వ్యవహరిస్తుండగా, వీటి పట్ల పోలీసుల్లో నిర్లక్ష్యం నెలకొడం విచారకరమన్న అభిప్రాయాలు వెల్లువెత్తుతున్నాయి. అయితే ఈ సీసీటీవీ కెమెరాలన్నింటినీ సెంట్రల్ పోలీస్ కమాండ్ కంట్రోల్ నుంచి స్వయంగా డీజీపీ కూడా పర్యవేక్షిస్తుంటారు. అయినా కానీ, సగానికి సంగం కెమెరాలు పనిచేయకపోవడాన్ని ఎవరూ పట్టించుకున్నట్టు లేదు.