భారీ వర్షాలు, వరదలపై సీఎం కేసీఆర్ చేసిన వ్యాఖ్యలు చర్చనీయాంశంగా మారాయి. వర్షాలు విదేశీ కుట్ర అంటూ ఆయన చేసిన కామెంట్స్ పై ప్రతిపక్షాలు తీవ్రస్థాయిలో మండిపడుతున్నాయి. బీజేపీ ఎమ్మెల్యే ఈటల రాజేందర్ స్పందిస్తూ కేసీఆర్ పై విరుచుకుపడ్డారు. కేసీఆర్ కు ఏదో ఆర్డర్ తప్పినట్లుందని అందుకే ఇలాంటి వ్యాఖ్యలు చేస్తున్నారని అన్నారు.
ముఖ్యమంత్రి హోదాలో ఉన్న వ్యక్తి ఏది పడితే అది మాట్లాడతారా? అని సెటైర్లు వేశారు రాజేందర్. మాట్లాడితే అర్థం ఉండాలని సూచించారు. వర్షం కురిపించడంలో విదేశీ కుట్ర ఎలా ఉంటుందని ప్రశ్నించారు. గతంలో కరువు పరిస్థితులు ఏర్పడినప్పుడు మేఘమథనం చేసినా వర్షాలు పడలేదన్న విషయాన్ని గుర్తు చేశారు.
రాష్ట్రంలోని వరద ప్రభావాన్ని అంచనా వేసేందుకు ముంపు ప్రాంతాల్లో పర్యటించారు సీఎం కేసీఆర్. భద్రాచలంలో ఉప్పొంగి ప్రవహిస్తున్న గోదావరి నదికి తొలుత శాంతి పూజలు నిర్వహించారు. తర్వాత వంతెన పైనుంచి గోదావరి పరిసరాలు పరిశీలించారు. కరకట్టను పరిశీలించి వరద వివరాలను అధికారులను అడిగి తెలుసుకున్నారు. ఆ తర్వాత భద్రాచలంలో పునరావాస కేంద్రాన్ని పరిశీలించారు.
దేశంలో పలు ప్రాంతాల్లో క్లౌడ్ బరస్ట్ సృష్టిస్తున్నట్లు తమకు తెలిసిందని.. దీని వెనుక విదేశీ కుట్ర ఉందని వ్యాఖ్యానించారు కేసీఆర్. గతంలో లద్దాఖ్ లోని లేహ్, ఉత్తరాఖండ్ లో అలాగే చేశారని గుర్తు చేశారు. గోదావరి పరివాహక ప్రాంతంపై కూడా అలాంటి కుట్ర చేసినట్లు సమాచారం వచ్చిందన్నారు. వాతావరణంలో సంభవించిన మార్పుల వల్ల ఇలాంటి ఉత్పాతాలు వస్తాయని, ప్రజలను కాపాడుకోవాల్సిన అవసరం ఉందని తెలిపారు సీఎం.