తెలంగాణ ఈసెట్, లాసెట్-2023 షెడ్యూల్ రిలీజ్ అయ్యింది. ఉస్మానియా యూనివర్సిటీ ఈ రెండు షెడ్యూల్స్ ని విడుదల చేసింది. మార్చి 1వ తేదీన టీఎస్ ఈసెట్, లాసెట్, పీజీ ఎల్ సెట్ నోటిఫికేషన్ విడుదల కానుంది. ఈ షెడ్యూల్ ను సోమవారం తెలంగాణ ఉన్నత విద్యామండలి చైర్మన్ ఆర్ లింబాద్రి, ఉస్మానియా యూనివర్సిటీ వీసీ డీ రవీందర్, ఈసెట్ కన్వీనర్ శ్రీరాం వెంకటేష్ కలిసి విడుదల చేశారు. మార్చి 2వ తేదీ నుంచి మే 5వ తేదీ వరకు ఈసెట్ ఆన్ లైన్ దరఖాస్తులను స్వీకరించనున్నారు.
రూ.500 లేట్ ఫీజుతో మే 8వ తేదీ వరకు, రూ.2500తో మే 12వ తేదీ వరకు దరఖాస్తు చేసుకోవచ్చు. దరఖాస్తు చేసుకున్న అభ్యర్థులు తమ దరఖాస్తులను మే 8 నుంచి మే 12వ తేదీ వరకు ఎడిట్ చేసుకునే ఆప్షన్ ఉంది. మే 15 నుంచి అభ్యర్థులు సంబంధిత వెబ్‌ సైట్ నుంచి హాల్ టికెట్లు డౌన్ లోడ్ చేసుకోవచ్చు. మే 20న ఈసెట్ ప్ర‌వేశ ప‌రీక్ష నిర్వ‌హించ‌నున్నారు. త‌దిత‌ర వివ‌రాల కోసం https://tsecet.nic.in/ అనే వెబ్‌ సైట్ ను చెక్ చేయవచ్చు.
అలాగే మార్చి 2 నుంచి ఏప్రిల్ 6వ తేదీ వరకు టీఎస్ లాసెట్, పీజీ ఎల్ సెట్ ఆన్ లైన్ దరఖాస్తులు స్వీకరించనున్నారు. ఓపెన్ కేట‌గిరి అభ్యర్థులకు రూ.900, ఎస్సీ, ఎస్టీ, పీహెచ్ అభ్యర్థులకు రూ.600గా దరఖాస్తు ఫీజు నిర్ధారించారు. రూ.500 ఆల‌స్య రుసుంతో ఏప్రిల్ 12 వరకు, రూ.1000తో ఏప్రిల్ 19 వరకు, రూ.2 వేల‌తో ఏప్రిల్ 26 వరకు, రూ.4 వేల‌తో మే 3వ తేదీ వరకు ఆన్ లైన్ లో దరఖాస్తులు సబ్మిట్ చేసుకోవచ్చు.
దరఖాస్తు చేసుకున్న అభ్యర్థులకు ఎడిట్ చేసుకునేందుకు మే 5 నుంచి 10వ తేదీ వరకు అవ‌కాశం క‌ల్పించారు. మే 16 నుంచి హాల్ టికెట్లు డౌన్ లోడ్ చేసుకోవచ్చు. మే 25న టీఎస్ లాసెట్, టీఎస్ పీజీ ఎల్‌సెట్ ప్ర‌వేశ ప‌రీక్ష‌ను ఆన్ లైన్ లో నిర్వ‌హించ‌నున్నారు. త‌దిత‌ర వివ‌రాల కోసం https://lawcet.tsche.ac.in/ అనే వెబ్‌ సైట్ ను చెక్ చేయవచ్చు.