సోష‌ల్ మీడియా అందుబాటులోకి వ‌చ్చిన త‌ర్వాత గూగుల్ ట్రాన్స్లేట్ ఎంతగా పాపులర్ అయ్యిందో ప్రత్యేకించి చెప్పాల్సిన అవ‌స‌రం లేదు. ఈ నేప‌థ్యంలో ఎన్నో కమ్యూనికేషన్ ఫీచర్లను గూగుల్ ట్రాన్స్లేట్ యూజర్లకు ఆఫర్ చేస్తోంది. ఇప్ప‌టికే వందకు పైగా భాషలను ట్రాన్స్లేట్ చేస్తూ చాలా మందికి ఉపయోగపడుతున్న గూగుల్.. ఇప్పుడు ఆ సేవలను మరింత మందికి విస్తరించేందుకు నడుంబిగించింది.
తాజాగా సంస్కృతం ట్రాన్స్లేట్ చేసేందుకు గూగుల్ సపోర్ట్ ప్రకటించింది. దీంతో సంస్కృతం ప్రియులు ఇతర భాషల సమాచారాన్ని సంస్కృతంలోకి, సంస్కృతంలో ఉన్న సమాచారాన్ని ఇతర భాషల్లోకి అనువదించడం సాధ్యమవుతోంద‌ని ఆనందం వ్య‌క్తం చేస్తున్నారు. సంస్కృతంతో సహా కొత్తగా 8 ఇండియన్ లాంగ్వేజెస్ ట్రాన్స్లేట్ కు జోడించినట్లు గూగుల్ ఒక ప్రకటనలో వెల్ల‌డించింది.
ఇతర దేశాలకు చెందిన మరో 16 భాషలను కూడా తమ ట్రాన్స్‌లేట్‌లో యాడ్ చేసింది గూగుల్. మొత్తంగా కొత్తగా 24 భాషలు జత కావడంతో గూగుల్ ట్రాన్స్లేట్ ఇప్పుడు ఏకంగా 133 భాషలకు సపోర్ట్ చేస్తున్న‌ట్టు గూగుల్ ప్రకటించింది. ఈ 24 లాంగ్వేజెస్ వరల్డ్ వైడ్ గా 30కోట్ల మంది మాట్లాడుతున్నారని తెలిపింది.
ట్రాన్స్‌లేట్‌లో సంస్కృతాన్ని జోడించాలని చాలా రోజులుగా త‌మ‌కు అభ్యర్థనలు అందుతున్నాయని.. యూజర్ల అభ్యర్థన మేరకు సంస్కృతం యాడ్ చేసిన‌ట్టు ప్రకటించింది గూగుల్. భారతదేశంలోని ఈశాన్య రాష్ట్రాల్లో మాట్లాడే భాషలను కూడా యాడ్ చేయనున్నట్టు స్ప‌ష్టం చేసింది. సంస్కృతం, అసామీ, మణిపురి, భోజ్‌పురి, డోగ్రీ, కొంకణి, మైథిలి, మిజో భాషలకు గూగుల్ ట్రాన్స్లేట్ సపోర్ట్ చేయనున్నట్టు ప్రకటించింది.