కొన్నిసార్లు కొందరి వ్యక్తుల బ్యాంకు ఖాతాల్లో ఊహించనంత డబ్బు వచ్చి పడుతుంది. అయితే.. అతడు దాని గురించి ఆరా తీసే లోపు ఆ మొత్తం మళ్లీ వెనక్కి వెళ్లిపోతుంది. ఇలాంటి వార్తలు చాలాసార్లు వింటూ ఉంటాం. అయితే.. అలా వచ్చిన డబ్బుతో పరారైన వ్యక్తుల గురించి అరుదుగా వింటుంటాం. చిలీ లో అలాంటి ఘ‌ట‌నే చోటు చేసుకుంది. ఆఫీస్ నుంచి సకాలంలో జీతం వచ్చింది కానీ.. జీతం కంటే వందల రెట్లు ఎక్కువ డబ్బు అతని ఖాతాలో చేరింది. ఆఫీసు తన తప్పును తెలుసుకునే లోపు అతడు ఆ మొత్తంతో ప‌రార‌య్యాడు.
కన్సోర్సియో ఇండస్ట్రియల్ డి అలిమెంటోస్ అనే చిలీ అతిపెద్ద కోల్డ్ కట్స్ నిర్మాత కంపెనీలో.. ప్రతి నెలా 500,000 పెసోలు అంటే భారతీయ కరెన్సీలో దాదాపు 43 వేల రూపాయల జీతానికి ప‌ని చేస్తున్నాడు. అయితే.. తాజాగా ఆ ఉద్యోగి ఖాతాలో అతని జీతానికి సుమారు 286 రెట్లు ఎక్కువ డబ్బు జ‌మ అయింది. అది 165,398,851 చిలీ పెసోలు అంటే.. భారత కరెన్సీ ప్ర‌కారం దాదాపు 1.5 కోట్లు ఉంటుంది.
ఈ డబ్బు ఖాతాలో చేరడంతో సదరు వ్యక్తి ఆశ్చర్యపోయాడు. ఇంత డబ్బు మళ్లీ కంపెనీకి ఇవ్వడం వల్ల ప్రయోజనం ఏముంటుందని అనుకున్నాడో ఏమో.. కానీ.. తన ఉద్యోగానికి రాజీనామా చేసి ఆ మొత్తం సొమ్ముతో ఉడాయించాడు. దీంతో ఆ సంస్థ న్యాయ‌ప‌ర‌మైన చిక్కుల్లో కూరుకుపోయింది. డబ్బు తీసుకుని పారిపోయిన ఉద్యోగి జాడ లేకపోవడంతో ఇక్కడి కంపెనీ హెచ్ఆర్ విస్తుపోయింది.
ఈ విషయమై కంపెనీ తరఫున డిప్యూటీ మేనేజర్‌ పోస్టులో పనిచేస్తున్న వ్యక్తిని విచారించగా.. అతడి ఖాతాను తనిఖీ చేశారు. కంపెనీ నుంచి పొరపాటున వచ్చిన డబ్బును తిరిగి ఇవ్వాలని కోరగా.. అందుకు అంగీకరించాడు. మరుసటి రోజు వారు అతని కోసం వేచి ఉన్నారు. కానీ.. బ్యాంకు నుండి ఎటువంటి నోటిఫికేషన్ లేకపోవడంతో కంపెనీ అతడిని సంప్రదించింది. ఇప్పుడు కంపెనీకి చట్టపరమైన చర్యలు తీసుకోవడం తప్ప మరో మార్గం లేకుండాపోయింది.