బ్రెజిల్ లో వరద బీభత్సం సృష్టించింది. భారీ వర్షాలు, వరదల కారణంగా దేశంలో పలు చోట్ల అనేక మంది ప్రాణాలు కోల్పోయారు. ఇప్పటి వరకూ 117 మంది మరణించినట్లు అధికార వర్గాలు వెల్లడించాయి. ఇంకా బురదలో చాలా మంది కూరుకుపోయినట్లు అధికారులు చెప్తున్నారు. దీని కారణంగా మృతుల సంఖ్య మరింత పెరిగే అవకాశముందని తెలుస్తోంది.
గల్లంతయిన వారి కోసం ప్రత్యేక బృందాలు గాలింపు చర్యలు చేపట్టాయి. ఇప్పటి వరకూ ఇంత స్థాయిలో వరదను చూడలేదని అధికారులు చెప్తున్నారు. బ్రెజిల్ లోని పెట్రోపాలిస్ నగరం మట్టిచరియలు నివాస ప్రాంతాల్లో విరుచుకుపడటంతో ఈ ప్రమాదం చోటు చేసుకున్నట్టు అధికారులు గుర్తించారు.
కేవలం మూడు గంటల్లోనే 25.8 సెంటీమీటర్ల వర్షపాతం నమోదైనట్టు అధికారులు వెల్లడించారు. హెలికాప్టర్ల ద్వారా రెస్క్యూ ఆపరేషన్ చేస్తున్నా ఫలితం కన్పించడం లేదని తెలిపారు. వాతావరణం కదలికలతో ప్రజలు భయాందోళనలకు గురవుతున్నారు. వరదలతో కుటుంబసభ్యులను పోగొట్టుకున్నామని ఆవేదన వ్యక్తం చేస్తున్నారు.
పెట్రోపొలిస్‌ లో 1932 తర్వాత ఈ స్థాయిలో వర్షపాతం నమోదుకావడం ఇదే తొలిసారని అధికారులు తెలిపారు. వేసవి పర్యాటకానికి గుర్తింపు పొందిన ఈ నగరం.. ప్రస్తుతం వరదలకు చిగురుటాకులా వణుకుతోంది.