ప్రేమ కోసం.. ప్రేమను గెలిపించుకోవటం ఎమైనా చేస్తుంటారు ప్రేమికులు. ఓ వ్యక్తి కూడా తన భార్యపై ప్రేమతో పెద్ద సాహసమే చేశాడు. కరోనా కారణంగా వచ్చిన ఎడబాటును తట్టుకోలేక భార్యకై పయనం అయ్యాడు. ఆర్థిక స్థోమత కారణంగా ప్రాణాలను సైతం లెక్కచేయకుండా సముద్ర బాట పట్టాడు. నడి సముద్రంలో ఎటు వెళ్తున్నాడో కూడా తెలియకుండా భార్యకై ముందుకు సాగాడు. ఇంతకీ అతడు తన భార్యని చేరుకున్నాడా? అసలు ఎందుకు ఇదంతా?
వియత్నాంకు చెందిన హొయాంగ్ హుంగ్ కరోనా కారణంగా తన భార్యకి దూరం కావాల్సి వచ్చింది. లాక్డౌన్, ప్రయాణ ఆంక్షలు, ఉద్యోగ సంబంధిత కారణాలతో భార్య ముంబయిలో ఉండిపోవాల్సి వస్తే.. భర్త మాత్రం స్వదేశాన్ని వీడి రాలేకపోయాడు. దీంతో రెండేళ్లు దాటినా ప్రత్యక్షంగా కలుసుకోవడానికి వీలు లేకుండా పోయింది. ఈ ఎడబాటును ఇక ఏమాత్రం భరించలేని అతడు భార్యను ఎలాగైనా కలవాలని అనుకున్నాడు.
ఈ క్రమంలోనే ముందు వియత్నాం నుంచి థాయ్లాండ్ వచ్చాడు. బ్యాంకాక్లోని సువర్ణభూమి విమానాశ్రయానికి వెళ్లి ముంబయికి ఓ టికెట్ కొందామనుకున్నాడు. కానీ, అక్కడే అతడికి షాక్ తగిలింది. వీసా లేదు కాబట్టి విమానం ఎక్కడం కుదరదని తేల్చిచెప్పారు అధికారులు. దీంతో హొయాంగ్ హుంగ్ బ్యాంకాక్లో బస్ ఎక్కి ఫుకెట్ చేరుకున్నాడు. అక్కడ ఓ చిన్న పడవను కొన్నాడు. నిజానికి అది ఓ రబ్బరు షీటు. గాలి కొడితే పడవలా మారుతుంది. పొరపాటున రంధ్రం పడితే అంతే సంగతులు.
అయినా, హుంగ్ ఆ రబ్బరు బోటుతోనే తన ‘ప్రేమ ప్రయాణాన్ని’ మొదలుపెట్టాడు. 2 వేల కిలోమీటర్ల దూరంలో ఉన్న గమ్యస్థానానికి సముద్ర మార్గాన బయలుదేరాడు. హుంగ్ కొన్న పడవకు ఇంజిన్లు, మోటర్లు వంటివి ఏమీ లేవు. తెడ్డు ఊపితేనే ముందుకు సాగుతుంది. మరో పెద్ద సవాల్.. నేవిగేషన్. సముద్రయానానికి కంపాస్లు, జీపీఎస్ పరికరాలు వంటివి ఎంతో కీలకం. కానీ, ఇవేవీ హుంగ్ దగ్గర లేవు. అయినా అలానే మొండిగా ముందుకు సాగాడు.
నడి సముంద్రంలో ఆ చిన్న రబ్బరు బోటుతో అతడికి ఎటు వెళ్తున్నాడో కూడా తెలియదు. బలమైన ఎదురుగాలుల దెబ్బకు ముందుకు వెళ్లాల్సిన పడవ అక్కడక్కడే తిరిగింది. కొన్నిసార్లు వెనుకకూ వెళ్లింది. 18 రోజులు గడిచాయి. ఫుకెట్లో బయలుదేరిన ప్రాంతం నుంచి అతడు చేరుకున్న దూరం 80 కిలోమీటర్లు మాత్రమే. అయినా అలానే ముందుకు సాగుతున్న హుంగ్.. మార్చి 23న సిమిలన్ దీవుల వద్ద ఓ జాలర్ల బోటులోని వారి కంటపడ్డాడు. వారు నౌకాదళాన్ని అప్రమత్తం చేశారు. వెంటనే రంగంలోకి దిగిన నేవీ సిబ్బంది.. హుంగ్ను కాపాడారు. తమ బోటులో ఎక్కించుకుని మళ్లీ థాయ్లాండ్కు తీసుకెళ్లిపోయారు.
హుంగ్ ఉద్దేశం మంచిది. అతడి సంకల్పం మహా దృఢమైంది. కానీ, గమ్యాన్ని చేరేందుకు ఎంచుకున్న మార్గం మాత్రం అతి క్లిష్టమైంది. ముఖ్యంగా 2 వేల కి.మీ సుదూర ప్రయాణం చేసేందుకు హుంగ్ వద్ద సరిపడా వనరులు లేవని చెప్పారు నేవీ సిబ్బంది. కొన్ని నీళ్లు, బిస్కెట్స్ వంటి డ్రై ఫుడ్ ప్యాకెట్లు, ఇన్స్టంట్ నూడుల్స్ మాత్రమే అతడి పడవలో కనిపించాయని వెల్లడించారు.
