తెలంగాణ సర్కార్ కట్టే డబుల్‌ బెడ్రూం ఇళ్ల పనులతో పాటు మరిన్ని నిర్మాణ పనులకు కాంట్రాక్టు ఇప్పిస్తామంటూ.. నగరానికి చెందిన వ్యక్తిని మోసం చేసిన ముఠాపై హైదరాబాద్‌ సీసీఎస్‌ పోలీసులు కేసు నమోదు చేశారు. రూ.579 కోట్ల పనులు సబ్‌ కాంట్రాక్ట్‌ కు ఇస్తామంటూ రూ.3 కోట్లు స్వాహా చేసినట్లు ఆరోపణలు ఉన్నాయని అధికారులు వెల్లడించారు.
వివరాల్లోకి వెళ్తే.. బంజారాహిల్స్‌ ప్రాంతానికి చెందిన సివిల్‌ ఇంజనీర్‌ కె.జగదీశ్వర్ కొన్నేళ్లుగా సాయి డక్స్‌ ఇంజనీర్స్‌ అండ్‌ ఇన్‌ ఫ్రాస్ట్రక్చర్స్‌ ప్రైవేట్‌ లిమిటెడ్‌ పేరుతో సంస్థ నిర్వహిస్తున్నాడు. అయితే.. శివప్రసాద్‌ అనే మధ్యవర్తి ద్వారా గతేడాది సెప్టెంబర్‌ 21న డీఎన్‌సీ ఇన్‌ ఫ్రాస్ట్రక్చర్‌ మేనేజింగ్‌ డైరెక్టర్‌ డి.నరేష్ చౌదరి జగదీశ్వర్ కి కలిశాడు. ఆ సందర్భంలో మహానంది కోల్‌ ఫీల్డ్స్‌ లిమిటెడ్‌ సంస్థకు చెందిన రూ.539 కోట్ల కాంట్రాక్టుకు సంబంధించిన లెటర్‌ ఆఫ్‌ ఇంట్రెస్ట్‌ చూపించాడు. ఆ కాంట్రాక్టు తనకే వచ్చిందంటూ నమ్మబలికాడు.
దీంతో పాటు తెలంగాణ సర్కార్ చేపడుతున్న డబుల్‌ బెడ్రూం ఇళ్లకు సంబంధించిన రూ.40 కోట్ల కాంట్రాక్టును కూడా సబ్‌ కాంట్రాక్టుకు ఇస్తానంటూ చెప్పాడు. దీంతో జగదీశ్వర్, నరేష్ లు ఒప్పందం చేసుకున్నారు. ఆ తర్వాత నరేష్ నుంచి జగదీశ్వర్ కు ఆ రెండు పనులు కాకుండా సంబంధం లేని పనులకు సంబంధించిన వర్క్‌ ఆర్డర్లు ఇచ్చారు. అదేందని ప్రశ్నిస్తే జీఎస్టీ ఇబ్బందుల నేపథ్యంలో అలా ఇవ్వాల్సి వచ్చిందంటూ చెప్పాడు. వారంలో అసలు పనులు ప్రారంభిద్దామంటూ అందుకు అవసరమైన ఖర్చుల నిమిత్తం డబ్బులు కావాలంటూ.. రూ.1.4 కోట్లు తీసుకున్నాడు. ఈ నగదు తీసుకునే సమయంలో నరేష్ తో పాటు అతడి భార్య, బంధువులు కూడా వచ్చారు. ఆపై పనులకు సరుకు కావాలని రెండు కంపెనీలకు రూ.50 లక్షలు, రూ.1.1 కోట్లు చొప్పున నగదు, ఆర్డర్లు ఇప్పించాడు. ఆ తర్వాత జగదీశ్వర్ కు ఎలాంటి సరుకు సరఫరా కాలేదు.
దీంతో కొన్నాళ్లు ఎదురు చూసిన జగదీశ్వర్ తన సబ్‌ కాంట్రాక్టులు, ఇచ్చిన నగదు విషయంపై నరేష్ ను సంప్రదించాడు. అతడి నుంచి ఎలాంటి స్పందన లేకపోవడంతో తాను మోసపోయానని తెలుసుకున్నాడు. దీనిపై తెలిసిన వారిని ఆరా తీయగా.. నరేష్ నేతృత్వంలోని ముఠా అనేక మందిని ఇదే పంథాలో మోసం చేసిందని.. దాదాపు ప్రతి సందర్భంలోనూ నకిలీ లెటర్‌ ఆఫ్‌ ఇంట్రెస్ట్‌ లు చూపించినట్లు తెలిసింది. దీంతో జగదీశ్వర్ సీసీఎస్‌ పోలీసులకు ఫిర్యాదు చేశాడు. ఈ నేపథ్యంలోనే నరేష్ అతని ముఠా సభ్యులతో పాటు సరుకు సరాఫరా కంపెనీలపై కేసు నమోదు చేసి పోలీసులు దర్యాప్తు ప్రారంభించారు.