గ్రేటర్ హైదరాబాద్ లోని ప్రజలు, పర్యాటకులకు మరింత చేరువ అయ్యేందుకు తెలంగాణ రాష్ట్ర రోడ్డు రవాణా సంస్థ స్పెషల్ ఆఫర్లను ప్రకటించింది. ప్రయాణికుల ఆర్థిక భారాన్ని తగ్గించేందుకు టి24 టికెట్ ను ఇప్పటికే అందజేస్తోన్న ఆర్టీసీ తాజాగా టి6, ఫ్యామిలీ 24 పేరుతో కొత్త టికెట్లను అందుబాటులోకి తీసుకువచ్చింది.
హైదరాబాద్ లోని బస్ భవన్ లో గురువారం టి6, ఫ్యామిలీ 24 టికెట్ల పోస్టర్లను టీఎస్ ఆర్టీసీ ఎండీ వీసీ సజ్జనర్ ఆవిష్కరించారు. ఈ టికెట్లు శుక్రవారం నుంచి బస్ కండక్టర్ల వద్ద అందుబాటులో ఉంటాయని ఆయన తెలిపారు.మహిళలు, సీనియర్ సిటిజన్ల సౌకర్యార్థం టి6 టికెట్ ను సంస్థ అందుబాటులోకి తీసుకువచ్చింది.
దీనిని రూ.50 చెల్లించి గ్రేటర్ హైదరాబాద్ పరిధిలోని సిటీ ఆర్డినరీ, మెట్రో బస్సుల్లో ఆరు గంటల పాటు వారు ఎక్కడి నుంచి ఎక్కడికైనా ప్రయాణించవచ్చు. ఉదయం 10 గంటల నుంచి సాయంత్రం 4 గంటల వరకు మాత్రమే టి6 టికెట్ చెల్లుబాటు అవుతుంది. ఉదయం 10 గంటల నుంచి మధ్యాహ్నం 2 గంటల వరకు ఈ టికెట్ బస్సుల్లో కండక్టర్లు ఇస్తారు.
మధ్యాహ్నం 2 గంటల తర్వాత టి6 టికెట్లను మంజూరు చేయరు. 60 ఏళ్లు పైబడిన సీనియర్ సిటిజన్లకు టి6 టికెట్ వర్తిస్తుంది. టికెట్ తీసుకునే సమయంలో వయసు ధ్రువీకరణ కోసం వారు ఆధార్ కార్డు చూపించాల్సి ఉంటుంది. ఇక వారంతాలు, సెలువు దినాల్లో కుటుంబ సభ్యులు, స్నేహితులు కలిసి ప్రయాణించేందుకు వీలుగా ఫ్యామిలీ 24 టికెట్ ను సంస్థ అందుబాటులోకి తెచ్చింది.
ఈ టికెట్ కు రూ. 300 చెల్లిస్తే.. నలుగురు రోజంతా సిటీ ఆర్డినరీ, మెట్రో బస్సుల్లో ప్రయాణించవచ్చు. ఐదేళ్ల లోపు చిన్నారులకు ప్రయాణం ఉచితం కాగా.. అంతకు పైబడిన వారు ఫ్యామిలీ 24 టికెట్ తీసుకోవచ్చు. శని, ఆదివారాలతో పాటు సెలవు దినాల్లో మాత్రమే ఈ ఆఫర్ ప్రయాణికులకు అందుబాటులో ఉంటుంది. ప్రస్తుతం గ్రేటర్ హైదరాబాద్ పరిధిలో తిరిగే బస్సుల్లో టి 24 టికెట్ ను సంస్థ అందజేస్తోంది. 24 గంటల పాటు ఆ టికెట్ చెల్లుబాటు అవుతుంది. ఆ టికెట్ ధర పెద్దలకు రూ.100 , పిల్లలకు రూ.60 గా ఉంది.