దేశంలోనికి మాదక ద్రవ్యాలు రాకుండా ఉండేందుకు అధికారులు ఎన్ని చర్యలు తీసుకుంటున్నప్పటికీ ఏదోక రూపంలో ఎంటర్‌ అయిపోతున్నాయి. వాటిని తరలించే వారు కూడా ఎంతో తెలివిగా వాటిని తరలిస్తున్నారు. తాజాగా ఢిల్లీ ఎయిర్‌ పోర్టులో ఓ వ్యక్తి కడుపులో నుంచి ఏకంగా రూ.11.28 కోట్ల విలువైన కొకైన్ ను కస్టమ్స్ అధికారులు సీజ్‌ చేశారు.
విమానాశ్రయంలో తనిఖీలు జరుపుతుండగా కొకైన్ అక్రమంగా, గుట్టు చప్పుడు కాకుండా తరలిస్తున్న విషయం బయటపడింది. బ్రెజిల్ కు చెందిన ఒక వ్యక్తి కస్టమ్స్ అధికారుల కళ్లు గప్పి కొకైన్ ను ఎయిర్‌ పోర్టు బయటకు తీసుకెళ్లే ప్రయత్నం చేశాడు. అతను కడుపులో 753 గ్రాముల కొకైన్ ను క్యాప్సుల్స్‌ రూపంలో దాచుకుని తరలించే ప్రయత్నం చేశాడు.
అయితే దీనిని పసిగట్టిన కస్టమ్స్ అధికారులు అతనిని పట్టుకుని విచారించి, కడుపులో ఉన్న కొకైన్ ను బయటకు తీయించారు. అతనిపై ఎన్‌డీపీఎస్ యాక్ట్ కింద కేసు నమోదు చేసి విచారణ చేస్తున్నట్లు కస్టమ్స్ అధికారులు తెలిపారు.