రికార్డుస్థాయిలో కుంభవృష్టి వర్షాలు కురుస్తున్నాయి. గత పదేళ్ల సెప్టెంబరు నెలలో ఎన్నడూలేనంత అత్యధిక వర్షపాతం తాజాగా నమోదైంది. శనివారం ఉదయం 8.30 నుంచి ఆదివారం ఉదయం 8.30 గంటల వరకూ 24 గంటల వ్యవధిలో భద్రాద్రి జిల్లా ఆళ్లపల్లిలో అత్యధికంగా 35.1 సెంటీమీటర్లు, రాజన్న జిల్లా అవునూర్‌లో 20.8, మర్తనపేటలో 20.3, ఎల్లారెడ్డిపేటలో 19.3 మెదక్‌ జిల్లా అల్లాదుర్గంలో 18, టేక్మాలులో 17.9, కొల్చారంలో 17.6, కరీంనగర్‌ జిల్లా చిగురుమామిడిలో 16.9 సెంటీమీటర్ల వర్షం కురిసింది.
గత పదేళ్లలో సెప్టెంబరు నెలలో 24 గంటల వ్యవధిలో 35.1 సెం.మీ.ల వర్షం కురవడం ఇదే తొలిసారి. ఇంతకుముందు అత్యధికంగా 2019 సెప్టెంబరు 18న నల్గొండలో 21.8 సెం.మీ.లు కురిసినట్లు వాతావరణశాఖ రికార్డుల్లో ఉంది. వాయుగుండం వల్ల కొన్ని ప్రాంతాల్లో అప్పటికప్పుడు కారుమేఘాలేర్పడి కుంభవృష్టి వర్షాలు కురుస్తున్నట్లు వాతావరణశాఖ తెలిపింది.
తెలంగాణలో 1908 నుంచి ఇప్పటివరకూ 24 గంటల వ్యవధిలో అత్యధిక వర్షం ఖమ్మం జిల్లా కోహెడలో 1996 జూన్‌ 17న 67.5 సెంటీమీటర్లు, రెండో అత్యధిక రికార్డు 1983 అక్టోబరు 6న నిజామాబాద్‌లో 35.5సెం.మీ.లుగా నమోదైంది. తాజాగా ఆళ్లపల్లిలో నమోదైన 35.1 సెం.మీ.ల వర్షపాతం మూడో అత్యధికం. ఆదివారం ఉదయం 8.30 నుంచి రాత్రి 7.30గంటల వరకూ 11గంటల వ్యవధిలోనే కాటారం లో 10.1, అబ్దుల్లాపూర్‌(నిర్మల్‌)లో 8.9 సెం.మీ.ల వర్షం కురిసింది. భారీ వర్షాలతో జిల్లాల్లో వాగులు పొంగి పొర్లుతున్నాయి. పలు గ్రామాలకు రాకపోకలు నిలిచిపోయాయి. పలుచోట్ల పంటలు నీటమునిగాయి. సిరిసిల్ల జిల్లాలో వాగులో కారు మునిగిన ఘటనలో అమ్మమ్మ, మనవడు ప్రాణాలు కోల్పోవడం విషాదం నింపింది. కరీంనగర్‌ జిల్లా గోపాల్‌పూర్‌ డ్యామ్‌లో ఓ వ్యక్తి మృతదేహం లభించగా నిజామాబాద్‌ జిల్లాలో కాలువలో ఒకరు గల్లంతయ్యారు.
భారీ వర్షాలకు సిరిసిల్లలోని శనివారం అర్ధరాత్రి నుంచి పెద్దచెరువు, జంగమయ్యకుంట, శుద్దగండి, కొత్త చెరువులు అలుగు పారాయి. వెంకంపేట, అశోక్‌నగర్‌, అనంతనగర్‌, సంజీవయ్యనగర్‌, శాంతినగర్‌, శ్రీనగర్‌ కాలనీలను వరద ముంచెత్తింది. పాత బస్టాండ్‌ నుంచి కొత్త చెరువు వరకు కిలోమీటరుకు పైగా రహదారి వరదతో నిండింది. ఈ వరదంతా శాంతినగర్‌ను ముంచెత్తింది. మరమగ్గాల కార్ఖానాలు నీట మునిగాయి. మంచిర్యాల జిల్లా చెన్నూరు సమీపంలోని బతుకమ్మవాగు వంతెనను ఆనుకొని నిర్మించిన అప్రోచ్‌రోడ్డు పూర్తిగా తెగిపోయింది.
దీంతో జాతీయ రహదారి-63 మీదుగా మహారాష్ట్రలోని సిరోంచా మార్గంలో రాకపోకలు నిలిచిపోయాయి. జయశంకర్‌ భూపాలపల్లి జిల్లా మహాముత్తారం మండలం సింగారం సమీపంలో లోలెవల్‌ కాజ్‌వేను దాటుతున్న కారు వరదలో చిక్కుకుంది. అందులో ఉన్న ముగ్గురిని స్థానికులు రక్షించారు. కాటారం, మహాముత్తారం మండలాల్లో సుమారు 2 వేల ఎకరాల్లో పత్తి, వరి నీట మునిగాయి. ములుగు జిల్లా వెంకటాపురం మండలంలో పెంకవాగు ఉప్పొంగడంతో తిప్పాపురం పెంకవాగు, కొత్తగుంపు, కలిపాక గ్రామాలకు; కంకలవాగు ప్రవాహంతో మల్లాపురం, కర్రెవానిముంపు గ్రామాలకు రాకపోకలు నిలిచాయి. కరీంనగర్‌ జిల్లా కరీంనగర్‌ గ్రామీణ మండలం గోపాల్‌పూర్‌ డ్యామ్‌లో గుర్తుతెలియని వ్యక్తి మృతదేహం లభ్యమైంది.