కొత్త కాన్సెప్టులతో సినిమాలు నిర్మించడానికి ఎప్పుడూ ముందుంటాడు హీరో నాని. ‘హిట్’ అనే సీట్‌ ఎడ్జ్ థ్రిల్లర్‌ను రూపొందించి సూపర్ డూపర్ హిట్ సాధించారు. రీసెంట్‌గా హిట్ సినిమాకు ఫ్రాంచైజీగా ‘హిట్ 2 ద సెకండ్ కేస్’ చిత్రాన్ని రూపొందిస్తోన్న సంగతి తెలిసిందే. క్రైమ్‌ ఇన్వెస్టిగేషన్‌ డ్రామా ఇది. హిట్ సినిమాతో ఆడియెన్స్ మెప్పించిన దర్శకుడు శైలేష్ కొల‌ను ద‌ర్శ‌క‌త్వంలోనే హిట్ 2 ద సెకండ్ కేస్ సినిమా రూపొందుతోంది.
‘హిట్ 2 – ద సెకండ్ కేస్’ చిత్రాన్ని జులై 29న విడుదల చేస్తున్నట్లు మేకర్స్ ప్రకటించారు. క్ష‌ణం, ఎవ‌రు, గూఢ‌చారి వంటి చిత్రాల‌తో వ‌రుస సూపర్ హిట్స్ కొట్టిన టాలెంటెడ్ హీరో అడివి శేష్ ఇందులో హీరోగా న‌టిస్తున్నాడు. ఈ మూవీలో కృష్ణ దేవ్‌ అలియాస్‌ కె.డి పాత్రలో కనిపించనున్నాడు అడివి శేష్. తెలంగాణ రాష్ట్రానికి చెందిన పోలీస్‌ ఆఫీసర్‌ అమ్మాయి మిస్సింగ్‌ కేసుని ఎలా డీల్‌ చేశాడనే కాన్సెప్ట్‌తో హిట్ (హోమిసైడ్‌ ఇంటర్‌వెన్షన్‌ టీమ్‌) సినిమాను రూపొందించిన సంగతి తెలిసిందే. ఇప్పుడు ఆంధ్రప్రదేశ్‌ చెందిన హిట్ టీమ్‌ ఆఫీసర్‌ కృష్ణ దేవ్‌ అలియాస్‌ కె.డి ఈ ఎగ్జయిటింగ్‌ జర్నీతో ప్రేక్ష‌కుల ముందుకు రాబోతున్నారు.
డైరెక్ట‌ర్ శైలేష్ ఖాతాలో ఫస్ట్ పార్ట్ ని పర్ఫెక్ట్ గా హ్యాండిల్‌ చేశారన్న క్రెడిట్‌ ఆల్రెడీ ఉంది. హిట్ సీక్వెల్‌ని కూడా పర్ఫెక్ట్ ఇన్వెస్టిగేషన్‌ డ్రామాగా, మరిన్ని థ్రిల్లింగ్‌ ఎలిమెంట్స్ జోడించి తెరకెక్కించారు. ఆల్రెడీ హిందీలో హిట్ ఫస్ట్ పార్ట్ రీమేక్‌ని రాజ్‌కుమార్‌ రావుతో పూర్తి చేశాడు ఈ దర్శకుడు.
