కరీంనగర్ జిల్లా గంగాధర మండలం వెంకటాయపల్లి గ్రామ సర్పంచ్ మేఘరాజ్ ఆడియో వైరల్ గా మారింది. తాను సర్పంచ్ గా గెలిచి నాలుగేళ్లు అయినప్పటికీ గ్రామ సెక్రటరీ లేడని ఆవేదన వ్యక్తం చేశారు. గ్రామ కార్యదర్శి లేక పనులు ఆగిపోయాయని, బిల్లులు రావడం లేదని ఆడియోలో పేర్కొన్నారు.
సెక్రటరీ లేకపోవడం వలన గ్రామ అభివృద్ధి కుంటుపడుతుందన్న మేఘరాజ్.. గ్రామ సెక్రటరీని వారం రోజుల్లో నియమించకపోతే ఆత్మహత్య చేసుకుంటానని హెచ్చరించారు. తన చావుకి జిల్లా పంచాయతీ అధికారి, మండల అభివృద్ధి అధికారి, ఏపీవోలే కారణమని తెలిపారు.
వైకుంఠధామం నిర్మించి సంవత్సరం అయినా ఇంకా రికార్డు చెయ్యలేదన్నారు. సెగ్రెషన్ షెడ్డు కట్టి నిర్మించినా.. అది భారీ వర్షాలకి కూలిపోయిందని ఆయన ఆడియో లో పేర్కొన్నారు. అధికారులు మెడ మీద కత్తి పెట్టి మళ్లీ నిర్మించాలని ఒత్తిడి తీసుకువస్తే మళ్లీ నిర్మించానని, కానీ ఇప్పటి వరకు రికార్డు చెయ్యలేదని ఆవేదన వ్యక్తం చేశారు.
ఇక మండల అభివృద్ధి కార్యాలయం ముందు ఆత్మహత్య చేసుకుంటానని ఆయన బెదిరించారు. తన చావుతోనైనా మిగతా అందరు సర్పంచులకు న్యాయం జరుగుతుందని మేఘరాజ్ ఆడియో ద్వారా తెలిపారు. ఈ వ్యాఖ్యలు ప్రస్తుతం సోషల్ మీడియాలో వైరల్ కావడంతో విషయం వెలుగులోకి వచ్చింది.