★ మహిళా సీఐ ఇంట్లో అడ్డంగా దొరికిన మరో సీఐ
★ ఇద్దరూ ఒకేచోట విధులు.. పెరిగిన చనువు
★ వారిద్దరూ హనుమకొండలో తన ఇంట్లో ఉండగా నిలదీసిన మహిళా సీఐ భర్త
★ అతనూ సీఐయే..మరో జిల్లాలో విధులు
★ అతని ఫిర్యాదుతో రంగంలోకి పోలీసులు
ఇద్దరూ ఒకే చోట పని చేస్తుండడంతో చనువు పెరిగి మహిళా సీఐ ఇంటికి వెళ్లాడు మరో సీఐ. ఈ విషయం తెలుసుకున్న మహిళా సీఐ భర్త (అతను కూడా సీఐయే) తన మిత్రులతో కలిసి… మరో సీఐను పోలీసులకు అప్పగించాడు.
ఈ ఘటన వరంగల్‌ పోలీసు కమిషనరేట్‌ సుబేదారీ పోలీస్‌ స్టేషన్‌ పరిధిలో చోటుచేసుకుంది. సుబేదారీ సీఐ ఎండీ షుకుర్‌ తెలిపిన వివరాల ప్రకారం.. హనుమకొండ రాంనగర్‌కు చెందిన ఓ మహిళా సీఐ వరంగల్‌ సీఐడీ కార్యాలయంలో పనిచేస్తోంది. అక్కడే బలభద్ర రవి అనే మరో ఇన్‌స్పెక్టర్‌ కూడా పనిచేస్తున్నాడు. వీరి మధ్య చనువు పెరిగింది.
ఇద్దరు ఒకరి ఇంటికి మరొకరు వెళుతున్నారు. దీనిపై మహిళా సీఐ భర్తకు అనుమానం వచ్చింది. ప్రస్తుతం ఆయన మహబూబాబాద్‌ జిల్లాలో రూరల్‌ సీఐగా పని చేస్తున్నాడు. వారిని పట్టుకోవాలని చాలాకాలంగా వేచి చూస్తున్నాడు. ఈ క్రమంలో మహిళా సీఐ ఇంటికి బలభద్ర రవి వచ్చాడు. వారిద్దరూ చాలాసేపు మాట్లాడుకున్నారు. ఈ విషయం తెలుసుకున్న మహిళా సీఐ భర్త తన మిత్రులతో కలిసి వచ్చి వారిద్దర్నీ నిలదీశాడు.
దీంతో ఇరు వర్గాల మధ్య ఘర్షణ జరిగింది. తాము ఆఫీస్‌ విషయాలు మాట్లాడుకుంటున్నామని వారు చెప్పారు. అయినా వారిద్దర్నీ మహిళా సీఐ భర్త, అతని మిత్రులు కట్టడి చేసి, సుబేదారీ పోలీసులకు ఫోన్‌ చేశారు. పోలీసులు వచ్చి రవిని అదుపులోకి తీసుకున్నారు. మహిళా సీఐ భర్త ఫిర్యాదుపై కేసు నమోదు చేశారు.
రవి తన ఇంటికి అనుమతి లేకుండా వస్తున్నాడని, అడ్డుకున్న తనను చంపేస్తానని బెదిరించాడని ఫిర్యాదులో పేర్కొన్నాడు. మహిళా సీఐ, మరో సీఐ బలభద్ర రవి మధ్య ఎలాంటి సంబంధం ఉందనేది దర్యాప్తు చేస్తున్నామని సీఐ షుకుర్‌ తెలిపారు.