హిందీ ‘జెర్సీ’ సినిమా వాయిదాల మీద వాయిదాలు పడుతోంది. ఇప్పటికే పలుమార్లు వాయిదా పడిన ఈ మూవీ.. తాజాగా మరోసారి వాయిదా పడింది. చివరగా డిసెంబర్ 31న విడుదల చేయాలని సన్నాహాలు చేసిన ఒమిక్రాన్ కేసుల సెగ తగలడంతో.. విడుదలకు మూడు రోజులుండగా వాయిదా వేశారు. తర్వాత ఏప్రిల్ 14న విడుదల చేయాలని కొత్త డేట్‌ను ఖరారు. చేశారు. కానీ మేకర్స్ ఉన్నట్టుండి మరో వారంపాటు రిలీజ్ కు వాయిదా వేశారు. వారం తర్వాత విడుదల చేయనున్నట్టు ప్రకటించారు.
అదే రోజున కన్నడ బ్లాక్ బాస్టర్, మోస్ట్ అవైటెడ్ చిత్రం ‘కేజీఎఫ్ ఛాప్టర్ 2’ కూడా అదే రోజు గ్రాండ్‌గా విడుదల కాబోతోంది. అయితే, కేజీఎఫ్-2 మూవీ క్రేజ్ ఉన్నప్పటికి తమ సినిమాపై నమ్మకంతో విడుదల చేయాలని ఫిక్స్ అయ్యారు. కొన్ని చోట్ల బుకింగ్స్ కూడా ఓపెన్ అయ్యాయి. అయితే, రెస్పాన్స్ అంత బాగా ఏమీ లేదు. అదే సమయంలో కేజీఎఫ్-2కు అడ్వాన్స్ బుకింగ్స్ అదిరిపోతున్నాయి. హిందీ బెల్ట్‌లో పెట్టిన టికెట్లు పెట్టినట్లే అయిపోతున్నాయి. దీంతో మరోసారి హిందీ జెర్సీని వాయిదా వేయకతప్పలేదు మేకర్స్.
పైగా ఇటీవల ‘పుష్ప’ మూవీ దెబ్బకు ’83’.. ‘ఆర్ఆర్ఆర్’ ధాటికి ‘ఎటాక్’ ఎలా అల్లాడిపోయాయో చూశాక.. ఇగోకు పోయి రిలీజ్ చేస్తే మొదటికే మోసం వస్తుందని భయపడ్డట్లున్నారు జెర్సీ నిర్మాతలు. ఈ కారణంగా ఈ నెల 14 నుంచి 21కి జెర్సీని వాయిదా వేస్తూ చిత్ర బృందం నిర్ణయం తీసుకున్నారు. సినిమాను ఇంత కాలం ఆపి కేజీఎఫ్-2కు బలి ఇవ్వడం ఎందుకనే వెనక్కి తగ్గారన్నది స్పష్టం తెలుస్తోంది. పదుల కోట్లు ముడిపడ్డ విషయంలో ఇగోకు వెళ్లడం కరెక్ట్ కాదనుకున్నారు మేకర్స్.
ప్రస్తుతానికి ఈ చిత్రాన్ని వారం రోజులే వాయిదా వేశారు. కేజీఎఫ్-2 బాక్సాఫీస్ పెర్ఫామెన్స్ చూసి ఇంకో వారం సినిమాను వాయిదా వేసే అవకాశం లేకపోలేదు.
తెలుగులో 2019 లో వచ్చిన జెర్సీ చిత్రం 67వ జాతీయ అవార్డుల ప్రదానోత్సవంలో ఎంపికైంది. దీంతో బాలీవుడ్‌లో షాహీద్ కపూర్‌ హీరోగా రీమేక్ చేశారు. తెలుగులో నేచురల్ స్టార్ నాని, హీరోయిన్ శ్రద్ధా శ్రీనాథ్‌ జంటగా నటించారు. గౌతమ్ తిన్ననూరి దర్శకత్వం వహించారు. హిందీలోనూ ఆయనే తెరక్కెక్కిస్తుండటం విశేషం. సితార ఎంటర్‌టైన్‌మెంట్స్ పతాకంపై సూర్యదేవర నాగవంశీ నిర్మించారు.
ఇక హిందీలో షాహీద్ కపూర్‌కు జంటగా మృణాల్ ఠాకూర్‌ నటించారు. అల్లు ఎంటర్‌టైన్‌మెంట్స్, దిల్ రాజు ప్రొడక్షన్స్, సితారా ఎంటర్‌టైన్‌మెంట్స్, బ్రాట్ ఫిల్మ్స్ బ్యానర్లపై దీన్ని అల్లు అరవింద్, దిల్ రాజు, సూర్య దేవర నాగ వంశీ, అమన్ గిల్ సంయుక్తంగా నిర్మించారు. మూవీ కోసం నార్త్ ఆడియెన్స్ ఎప్పటి నుంచో ఎదురుచూస్తున్నారు.
షాహిద్ చేసిన ‘అర్జున్ రెడ్డి’ రీమేక్ ‘కబీర్ సింగ్’ లాగే ‘జెర్సీ’ కూడా హిందీ ప్రేక్షకులను ఆకట్టుకుంటుందనే భరోసా ఉన్నప్పటికీ రిలీజ్ టైమింగ్ తేడా కొట్టకూడదనే సినిమాను వాయిదా వేశారు. దీంతో షాహిద్ అభిమానులు, ప్రేక్షకులు కొంత డిజపాయింట్ అవుతున్నారు.
