కళా వెంకట్రావు, టీడీపీ పోలిట్ బ్యూరో సభ్యుడు
నవరత్నాలు నవమోసాలయ్యాయి. విద్యుత్ ఛార్జీలు రెట్టింపు చేయడం మొదటి మోసం. ఇసుక రేట్లు 4 రెట్లు పెంచడం రెండవ మోసం. మద్యం రేట్లు 5 రెట్లు పెంచడం మూడవ మోసం. వ్యవసాయ మోటార్లకు మీటర్లు పెట్టడం నాలుగవ మోసం. ఓటిఎస్ వసూళ్లు, పేదవాళ్ల మెడకు ఉరితాళ్లు బిగించడం ఐదవ మోసం. 2.30 లక్షల ఉద్యోగ ఖాళీలు భర్తీ చేయకపోవడం ఆరవ మోసం. ఉద్యోగులకు పిఆర్సి ఇవ్వకపోవడం ఏడవ మోసం. చెత్తపన్ను, ఆస్తి పన్ను పెంచడం ఎనిమిదవ మోసం. ఎస్సీ, ఎస్టీ, బీసీ, మైనారిటీ సబ్ ప్లాన్ నిధులు మళ్లించడం తొమ్మిదవ మోసం. ఇలా నవరత్నాలు నవ మోసాలయ్యాయి.
కరోనాతో కోలుకోలేని దెబ్బతిన్న పేద, మధ్య తరగతి ప్రజలపై రాష్ట్ర ప్రభుత్వం మరోసారి విద్యుత్ ఛార్జీలు పెంచి భారం మోపాలనుకోవడం దుర్మార్గమైన చర్య. జగన్ రెడ్డి చెప్పేదొకటి చేసేదొకటి గా ఉంది.
ట్రూ-అప్ ఛార్జీలపై హైకోర్టు ప్రమేయంతో వెనక్కి తగ్గినట్లు తగ్గి ఇప్పుడు దొడ్డిదారిన స్లాబులు మార్చి ఛార్జీలు పెంచాలను కోవడం జగన్ రివర్స్ విధానానికి ఉదాహరణ. 0-30 స్లాబు విధానం ఏ రాష్ట్రంలో లేదు. స్లాబ్ లలో యూనిట్లను తగ్గించి రేట్లు పెంచడం వల్ల నష్టపోయేది పేద, మద్య తరగతి వర్గాల వారే.
పేదవారు కేవలం 30 యూనిట్లకు పరిమితం అయ్యి విద్యుత్ వాడుకోవాలని చెప్పడం జగన్ రెడ్డి మోసకారి విధానానికి నిదర్శనం. ఎంతటి పేద కుటుంబమైనా ఇప్పుడున్న పరిస్థితుల్లో ఒక్కో కుటుంబం నెలకు 150 -200 యూనిట్లు వాడకం ఉంటోంది. ఎటువంటి సబ్సిడి లేని పేద, మధ్య తరగతి వర్గాల నుంచి 30 యూనిట్ల పైన వాడితే వారినుంచి రూ.2.80, వసూలు చేయడం దుర్మార్గం. ప్రమాణ స్వీకారోత్సవసభలో విద్యుత్ ఛార్జీలన్నింటిని తగ్గించేస్తానని చెప్పి ఇప్పటికి ఆరుసార్లు పెంచి రూ.11,611 కోట్ల భారం ప్రజలపై మోపారు.
దక్షిణాది రాష్ట్రాలలో ఏ రాష్ట్రంలో లేని అధిక ఛార్జీలు ఏపీలో వసూలు చేస్తున్నారు. రూ. 26,261 కోట్లు అప్పులు తెచ్చి ఫవర్ ఫైనాన్స్ కార్పొరేషన్ ను అప్పుల ఊబిలో ముంచారు. ఇప్పటికైనా దొడ్డిదారిన ఛార్జీలు పెంచడం మాని విద్యుత్ సంస్థలను బలోపేతం చేసేలా తగిన చర్యలు తీసుకోవాలి. ఇప్పుడు అమలు చేస్తున్న 50 యూనిట్ల స్లాబ్ విధానాన్ని యథావిధిగా కొనసాగించి పేదవారిపై భారం లేకుండా చూడాలి.
