కామారెడ్డి, తొలివెలుగు: మాస్టర్ ప్లాన్ లో తన భూమి కోల్పోతాననే ఆవేదనతో బాలకృష్ణ అనే రైతు మంగళవారంనాడు ఆత్మహత్యాయత్నం చేశాడు. వెంటనే అతడిని ఆసుపత్రికి తరలించారు. కామారెడ్డి మాస్టర్ ప్లాన్ ను నిరసిస్తూ రైతులు గత కొంతకాలంగా ఆందోళనలు నిర్వహిస్తున్నారు. ఈ నెల 4వ తేదీన అడ్లూరు ఎల్లారెడ్డి గ్రామానికి చెందిన రైతు రాములు ఆత్మహత్య చేసుకున్నాడు. ఇవాళ బాలకృష్ణ అనే రైతు పురుగుల మందు తాగి ఆత్మహత్యాయత్నం చేశాడు. వెంటనే గుర్తించిన స్థానికులు అతడిని ఆసుపత్రికి తరలించారు. మాస్టర్ ప్లాన్ లో తన భూమి పోతోందని రైతు ఆందోళనతో పురుగుల మందు తాగినట్టుగా రైతు జేఏసీ నేతలు చెబుతున్నారు.
కామారెడ్డి మాస్టర్ ప్లాన్ ను నిరసిస్తూ రైతు జేఏసీ ఆధ్వర్యంలో రైతులు ఆందోళనలు నిర్వహిస్తున్నారు.ఈ నెల 5వ తేదీ నుండి రైతులు ఆమ ఆందోళనలను ఉధృతం చేశారు. మాస్టర్ ప్లాన్ లో తన భూమి పోతోందనే ఆవేదనతో రాములు ఆత్మహత్య చేసుకోవడంతో ఆందోళనలను రైతు జేఏసీ సీరియస్ గా తీసుకుంది. ఈ నెల 5న కలెక్టరేట్ ముట్టడించింది. మాస్టర్ ప్లాన్ పై కలెక్టర్ ప్రకటన చేయాలని రైతులు డిమాండ్ చేశారు. ఉదయం నుండి రాత్రి వరకు కలెక్టరేట్ ముందు ఆందోళన నిర్వహించారు. ఈ ఆందోళనకు బీజేపీ, కాంగ్రెస్ లు మద్దతు ప్రకటించాయి. బీజేపీ ఎమ్మెల్యే రఘునందన్ రావు, మాజీ ఎమ్మెల్యే ఏనుగు రవీందర్ రెడ్డిలు ధర్నాలో పాల్గొన్నారు.
కామారెడ్డి మాస్టర్ ప్లాన్ ను నిరసిస్తూ విలీన గ్రామాలకు చెందిన 9 మంది కౌన్సిలర్లు రాజీనామాలు సమర్పించాలని జేఏసీ డెడ్ లైన్ పెట్టింది. ఈ డెడ్ లైన్ నేపథ్యంలో ఇప్పటికే ఇద్దరు బీజేపీ కౌన్సిలర్లు రాజీనామాలు చేశారు. మిగిలిన కౌన్సిలర్లు రాజీనామాలు చేయాలని జేఏసీ నేతలు కోరుతున్నారు.ఈ నెల 20వ తేదీన ఎమ్మెల్యే ఎమ్మెల్యే ఇంటిని ముట్టడించాలని రైతు జేఏసీ నిర్ణయం తీసుకుంది. కామారెడ్డి రైతుల తరహలోనే జగిత్యాల మాస్టర్ ప్లాన్ ను నిరసిస్తూ రైతులు ఆందోళనకు దిగారు. ఇవాళ జగిత్యాల కలెక్టరేట్ ను రైతులు ముట్టడించారు. మాస్టర్ ప్లాన్ ను వెనక్కి తీసుకోవాలని రైతులు డిమాండ్ చేశారు.
జగిత్యాల టౌన్ మాస్టర్ ప్లాన్ పై ఆందోళనలు రోజురోజుకి తీవ్రతరమవుతున్నాయి. వెంటనే మాస్టర్ ప్లాన్ ని రద్దు చేయాలని నర్సింగాపూర్‌ మహిళా రైతులు బీఆర్ఎస్ ఎమ్మెల్యే సంజయ్‌ ఇంటి ముందు నిరసనకు దిగారు. ప్రభుత్వానికి వ్యతిరేకంగా నినాదాలు చేశారు. మా భూములను తీసుకోవద్దని ఎమ్మెల్యేకు వినతి పత్రం అందజేశారు. ఈ సందర్భంగా వారికి అండగా ఉంటానని… ఒక్క గుంట భూమిని కూడా ఎక్కడికి పోనిచ్చేది లేదని రైతులకు హామీ ఇచ్చారు. రైతుల భూములను మాస్టర్ ప్లాన్ నుంచి తొలగిస్తామని చెప్పారు.
మాస్టర్ ప్లాన్ ను వ్యతిరేకిస్తూ సోమవారం జగిత్యాల రూరల్ మండలం తిమ్మాపూర్ గ్రామ పాలకవర్గం రాజీనామా చేసింది. తిమ్మాపూర్ సర్పంచ్ మెరుగు రమ్య (కాంగ్రెస్), ఉప సర్పంచ్ ఏలేటి మోహన్ రెడ్డి(బీఆర్ఎస్) తో సహా ఎనిమిది మంది వార్డు మెంబర్ల రాజీనామాలు చేశారు. మరోవైపు వ్యవసాయ శాఖ మార్కెట్ కమిటీ(AMC) డైరెక్టర్ దుమాల రాజేష్ కూడా రాజీనామా చేశారు. నూతన మాస్టర్ ప్లాన్‌లో జగిత్యాల చుట్టు పక్కల గ్రామాలతో పాటు వ్యవసాయ భూములను కలుపుతూ అధికారులు పబ్లిక్‌ జోన్‌, సెమీ పబ్లిక్‌ జోన్‌లుగా ముసాయిదా రూపొందించిన విషయం తెలిసిందే.