పాలన గాలికొదిలేసిన జగన్

రాష్ట్రంలో పాలన గాలికి వదిలేశారని బీజేపీ రాష్ట్ర శాఖ అధ్యక్షుడు కన్నా లక్ష్మీనారాయణ మండిపడ్డారు. రాష్ట్రంలో ప్రభుత్వం ఉందా లేదా అని ప్రజల్లో అభిప్రాయం వ్యక్తం అయ్యిందోనని ఆయన అన్నారు. గ్రామ సచివాలయం, వార్డ్ వలంటీర్ల పరీక్షలు కూడా అపహాస్యం చేశారని, బలహీన వర్గాలకు రిజర్వేషన్లు అమలు చేయలేదని, ఇష్టానుసారం నియామకాలు చేశారని కన్నా జగన్ సర్కారుపై విరుచుకుపడ్డారు.

విజయవాడ: బీజేపీ రాష్ట్ర అధ్యక్షుడు కన్నా లక్ష్మీ నారాయణ నేతృత్వంలో బీజేపీ ప్రతినిధి బృందం రాజ్‌భవన్‌లో గవర్నర్ బిశ్వా భూషణ్ హరిచందన్‌ని కలిసి ఒక మెమోరాండం అందించింది. మూడు అంశాలపై గవర్నర్‌ దృష్టికి తీసుకొచ్చామని కన్నా మీడియాకు వివరించారు. భవన నిర్మాణ పనులు నిలిచిపోవడం వలన కార్మికులు రోడ్డున పడ్డారని, ప్రజల కడుపులు మాడుతున్నాయని లేఖ రాసినా పట్టించుకోలేదని కన్నా గవర్నర్‌కు అందించిన మెమోరాండంలో ఆరోపించారు. ఇసుక ప్రజలకు అందుబాటులో లేదని చెప్పారు. సీఎం జగన్ చెప్పిన మాటలకు, చేస్తున్న పనులకు పొంతన లేదని అన్నారు. ఇసుక బ్లాక్‌లో దొరుకుతుంది తప్ప ప్రజలకు అందడం లేదని అన్నారు. దేవాలయ భూముల విషయంలో ప్రభుత్వం తన నిర్ణయాన్ని ఉపసంహరించుకోవాలని కన్నా కోరారు. 2017లో అసిస్టెంట్ ప్రొఫెసర్ల పోస్టులు నిలిచిపోయాయని, వారికి పోస్టులు ఇవ్వాలని గవర్నర్‌కి తెలియజేసినట్టు కన్నా మీడియాకి తెలిపారు. ఈ సమస్య పరిష్కారానికి విజయవాడలో ధర్నా చేస్తామని హెచ్చరించారు.