సీఎం కేసీఆర్ మహబూబాబాద్ టూర్ నేపథ్యంలో పర్యటనను విపక్షాలు అడ్డుకునే అవకాశముందని తెలియడంతో పోలీసులు ముందస్తు జాగ్రత్తలు తీసుకున్నారు. జిల్లా వ్యాప్తంగా ప్రతిపక్షాల నాయకులు, వివిధ సంఘాల లీడర్లను ముందుగానే అరెస్ట్ చేశారు. బుధవారం అర్థ రాత్రి అదుపులోకి తీసుకొని పలు పోలీసు స్టేషన్లకు తరలించారు.
ఇదిలా ఉండగా తమను అకారణంగా అరెస్ట్ చేయడం పై ప్రతిపక్ష నాయకులు మండిపడుతున్నారు. అరెస్ట్ అయిన వారిలో కాంగ్రెస్, బీజేపీ, న్యూడెమోక్రసీ,పిడిఎస్ సంఘాల లీడర్లు ఉన్నారు. మరో వైపు సీఎం పర్యటన నేపథ్యంలో 1600 మంది పోలీసులతో భారీ బందోబస్తును ఏర్పాటు చేయడం జరిగింది.
మహబూబాబాద్ లో బీఆర్ఎస్ పార్టీ ఓపెనింగ్, ఇంటిగ్రేడెట్ కలెక్టరేట్ల లను సీఎం కేసీఆర్ ప్రారంభం చేయనున్నారు. ఈ మేరకు అన్ని ఏర్పాట్లను అధికారులు పూర్తి చేశారు. మంత్రులు ఎర్రబెల్లి దయాకర్ రావు, సత్యవతి రాథోడ్ దగ్గరుండి ఏర్పాట్లను పర్యవేక్షించారు. స్థానిక ప్రజాప్రతినిధులు సైతం ఆఫీసర్లకు సూచనలు, సలహాలు చేశారు. ఎలాంటి అవాంఛనీయ సంఘటనలు జరగకుండా పోలీసు బందోబస్తు ఏర్పాటు చేశారు.
ఇక కేసీఆర్ టూర్ కు సంబంధించిన షెడ్యూల్ ను సీఎం కార్యాలయం బుధవారం విడుదల చేసింది. మొదటగా పట్టణ శివారు తాళ్లపూసపల్లి వద్ద ఏర్పాటు చేసిన హెలీప్యాడ్ వద్దకు కేసీఆర్ చేరుకోనున్నారు. అక్కడి నుంచి రోడ్డు మార్గం ద్వారా బీఆర్ఎస్ పార్టీ ఆఫీసుకు వెళ్తారు. పార్టీ ఆఫీసు ఓపెనింగ్ అనంతరం కలెక్టరేట్ కు చేరుకుంటారు. కలెక్టరేట్ ప్రారంభించాక ఆఫీసర్లతో మాట్లాడుతారు. మధ్యాహ్నం 1.25 గంటలకు భద్రాద్రి కొత్తగూడెం వెళ్తారు కేసీఆర్.