మూవీ ఆర్టిస్ట్ అసోసియేష‌న్ ఎన్నిక‌ల‌కు న‌గ‌రా మోగింది. 2021-23 సంవ‌త్స‌రాల‌కు గాను ఎన్నికల నోటిఫికేషన్ విడుద‌లైంది. అక్టోబర్ 10న అంటే ఆదివారం ఉదయం 8 గంటల నుంచి మధ్యాహ్నం 2 గంటల వరకూ జూబ్లీహిల్స్‌ పబ్లిక్‌ స్కూల్‌లో పోలింగ్ జ‌ర‌గ‌నుందని ఎన్నికల నోటిఫికేషన్ జారీ చేసిన ఎన్నికల అధికారి వి.కృష్ణమోహన్ ప్ర‌క‌టించారు.
ఈ నెల 27 నుంచి 29 వరకూ నామినేషన్లు స్వీకరిస్తారు. 30న నామినేషన్ల పరిశీలన ఉంటుంది. నామినేషన్‌ ఉపసంహరణకు వచ్చే నెల 1–2 తేదీల్లో సాయంత్రం 5 గంటల వరకూ గడువు ఉంటుంద‌ని, 2వ తేదీన సాయంత్రం పోటీలో ఉన్న అభ్య‌ర్థుల జాబితా ప్ర‌క‌టించ‌నున్నారు. పోలింగ్ జ‌రిగిన అక్టోబర్ 10 సాయంత్రం 7గంట‌ల‌కు ఫ‌లితాల‌ను ప్ర‌క‌టించ‌నున్నారు.
నియమ నిబంధనలు:
1. ఒక అభ్యర్థి ఒక పోస్ట్‌ కోసమే పోటీ చేయాలి.
2. గత కమిటీలో ఎగ్జిక్యూటివ్‌ మెంబర్‌ అయి ఉండి, 50 శాతం కన్నా తక్కువ ఈసీ మీటింగ్‌లకు హాజరు కాకపోతే పోటీ చేసే అర్హత ఉండదు.
3. 24 క్రాఫ్ట్స్‌లో ఆఫీస్‌ బేరర్స్‌గా ఉన్న వారు ఆ పదవులకు రాజీనామా చేయకపోతే ‘మా’ ఎన్నికల్లో పోటీ చేయడానికి అర్హులు కారు.
