బ్రిటన్ ప్రధాని రిషి సునాక్ అధికారిక నివాసం వద్ద ఓ వ్యక్తి కారుతో దాడి చేయడానికి చేసిన యత్నం అందర్నీ షాక్ కి గురి చేసింది. లండన్ లోని 10 డౌనింగ్ స్ట్రీట్ గేటును ఈ వ్యక్తి కారుతో ఢీకొట్టాడు. బ్రిటన్ కాలమానం ప్రకారం గురువారం సాయంత్రం నాలుగున్నర గంటల సమయంలో ఈ ఘటన జరిగింది. గేటును కారు ఢీకొన్న వెంటనే అప్రమత్తమైన భద్రతా సిబ్బంది.. ఆ వ్యక్తిని అదుపులోకి తీసుకున్నారు. తెల్లని జుట్టుతో ఉన్న అతడిని వారు అరెస్ట్ చేసి తీసుకువెళ్తున్న దృశ్యాలు వైరల్ అయ్యాయి. ఈ ఘటన జరిగిన సమయంలో సునాక్ తన కార్యాలయంలోనే ఉన్నారు.
సాధారణంగా బ్రిటన్ ప్రధాని నివాసం 10 డౌనింగ్ స్ట్రీట్ వద్ద ఎప్పుడూ గట్టి సెక్యూరిటీ ఉంటుంది. రక్షణ వ్యవస్థలో భాగంగా బలమైన ఇనుప గేట్లు ఉంటాయి. దేశ పార్లమెంటుకు ఇది దగ్గరి మార్గం.. ఇక్కడి ఎంట్రెన్స్ వద్ద గతంలోనే లోనే భారీ గేట్లను ఏర్పాటు చేశారు. 1991 ప్రాంతంలో ఐరిష్ రిపబ్లిక్ ఆర్మీ లండన్ లో బాంబు దాడులకు పాల్పడిన దృష్ట్యా ఇక్కడ భద్రతను పెంచారు. కాగా తాజా ఘటన ప్రమాదవశాత్తూ జరిగిందా లేక కావాలనే ఆ వ్యక్తి ఈ దాడి యత్నానికి పూనుకొన్నాడా అన్నది తెలియడంలేదు.
ఉగ్ర దాడి కాకపోవచ్చునని పోలీసులు భావిస్తున్నారు. క్రిమినల్ డ్యామేజ్, డేంజరస్ డ్రైవింగ్ ఆరోపణలపై అతడిని అరెస్టు చేసినట్టు వారు చెప్పారు. ఈ సంఘటనలో ఎవరూ గాయపడలేదన్నారు. 10 డౌనింగ్ స్ట్రీట్ గేటును కారు ఢీకొన్న వెంటనే ఇక్కడి అధికారులను వారి కార్యాలయంలోనే ఉండవలసిందిగా పోలీసులు కోరారు. అయితే కొద్దిసేపటిలోనే వారు బయటకు వచ్చారు. ఓ సిల్వర్ కియా ప్యాసింజర్ కారు వేగంగా వచ్చి గేటును ఢీకొన్న ఫోటోలు, వీడియోలు సోషల్ మీడియాలోసర్క్యులేట్ అయ్యాయి.
అలాగే ఆ వ్యక్తి చేతులకు పోలీసులు సంకెళ్లు వేసి తీసుకువెళ్తున్న దృశ్యాలు సీసీటీవీ కెమెరాలో రికార్డయ్యాయి. అధికారులు ఈ కారులోపల తనిఖీ చేసి పెద్ద వైట్ షీట్ ని స్వాధీనం చేసుకున్నారు. ఇటీవలే అమెరికాలో వైట్ హౌస్ వద్ద 19 ఏళ్ళ ఓ ఇండో-అమెరికన్ యువకుడు తన ట్రక్కుతో సెక్యూరిటీ బ్యారికేడ్ ను ఢీకొట్టిన ఘటనను ఈ సందర్భంగా గుర్తు చేస్తున్నారు. సాయి వర్షిత్ కందుల అనే ఆ యువకుడు అడాల్ఫ్ హిట్లర్ సిధ్ధాంతాలకు ఆకర్షితుడై ఈ దాడికి యత్నించాడని తెలిసింది. ఈ యువకుడు అద్దెకు తెచ్చుకున్న ట్రక్కులో పేలుడుపదార్థాలను సెక్యూరిటీ సిబ్బంది, పోలీసులు స్వాధీనం చేసుకున్నారు.