అమెజాన్ అడవంటే మాటలా…!? ప్రపంచంలో ఉన్న జంతువుల్లో 10 శాతం ఈ అడవుల్లోనే పొట్టపోసుకుంటున్నాయి. అంతేనా 4.7 కోట్ల మంది ప్రజలు కూడా అక్కడక్కడా నివసిస్తుంటారు. 6.7 మిలియన్ చదరపు కిలోమీటర్ల పరిధిలో విస్తరించి ఉంది మరి.!
ఈ అడవిలో తప్పిపోయామంటే తిరనాళ్ళలో తప్పిపోయిన చంటిపిల్లోళ్ళా అయిపోతాం. మరే…! అడుక్కో జంతువు ఉంటుంది దేన్నని అడ్రస్ అడుగుతాం. తప్పిపోయిన వాణ్ణి ఎక్కడని వెతుకుతాం. ఒంటరిగా తప్పిపోతే ప్రాణాలతో బయటపడడం అదృష్టమే అవుతుంది.
నార్తర్న్ బొలీవియాలో తన స్నేహితుల బృందం నుంచి 30 ఏళ్ల ’జోనాదన్ అకోస్టా’ తప్పిపోయాడు. అదే అడవిలో 31 రోజుల తర్వాత బయటపడ్డారు.
బతికేందుకు పురుగులు, కీటకాలు తిని, కాలికి ఉన్న షూ తీసి అందులో వర్షపు నీరు పట్టుకుని తాగినట్టు జోనాదన్ తన కథనాన్ని యూనీటెల్ టీవీతో పంచుకున్నారు.
మరోవైపు ప్రమాదకరమైన జంతువుల నుంచి కాపాడుకోవడం కూడా ఆయనకు పెద్ద సవాలుగా మారింది. జోనాదన్ తప్పిపోవడంతో ఆయన కోసం కుటుంబ సభ్యులు వెంటనే అన్వేషణ ప్రారంభించారు.
చివరికి 31 రోజుల తర్వాత అమెజాన్ అడవుల్లో ఆయన్ని గుర్తించారు. వంట్లో తగినంత నీరు, లవణాలు లేక, నీరసించిపోయి, 17 కిలోల బరువు తగ్గిపోయిన స్థితిలో జోనాదన్ కనిపించారు.