హైదరాబాద్ సిటీలో మాదకద్రవ్యాలు సరఫరా ఆందోళనకు గురి చేస్తోంది. ఎక్కడికక్కడ కట్టడి చేస్తున్నా.. చాపకింద నీరులా పాకుతూనే ఉంది. తాజాగా సిటీలో మాదకద్రవ్యాలు సరఫరా చేస్తుండగా భరత్ అనే మోస్ట్ వాంటెడ్ క్రిమినల్ ను పోలీసులు పట్టుకున్నారు. పక్కా సమాచారంతో అంబర్ పేటలో అతడిని అదుపులోకి తీసుకున్నారు పోలీసులు.
అతని వద్ద నుండి 15 గ్రాముల ఎండీఎంఏ స్వాధీన పరుచుకున్నారు. గత కొన్ని సంవత్సరాలుగా సిటీలో భరత్ మాదక ద్రవ్యాల సరఫరాకు పాల్పడుతున్నట్లు తెలిపారు. ఢిల్లీ, ముంబై, గోవా లాంటి ప్రాంతాల నుంచి మాదక ద్రవ్యాలు తీసుకొచ్చి హైదరాబాద్ లో అమ్ముతున్నట్లు చెప్పారు.
అలాగే భరత్ నుంచి మాదక ద్రవ్యాలు కొనుగోలు చేసే ఆరుగురు కస్టమర్లను కూడా గుర్తించారు పోలీసులు. భరత్ 2020లోనే ఎక్సైజ్ అధికారుల చేతికి చిక్కి అరెస్ట్ అయ్యాడు.
ప్రస్తుతం భరత్ అతిపెద్ద మాదక ద్రవ్యాలు సరఫరా చేసే మాఫియాను నడుపుతున్నట్లు పోలీసులు వెల్లడించారు. మరిన్ని విషయాలను అతని వద్ద నుంచి రాబట్టే పనిలో నిమగ్నమయ్యారు పోలీసులు.